Amagqwetha enhlanganiso yeZimbabwe Lawyers for Human Rights athi asephanyeke edale leHigh Court udaba lwabalwela ilungelo loluntu asebelamaviki edlula amathathu bevalelwe eRemand Prison kulandela ukwalelwa kwabo ngumatshi ukuthi bethoniswe bevela emizini yabo.
Inhlanganiso le eyethule umbiko lo enkundleni yokuxhumana eyeX, ithi uMnu. Robson Chere, uNkosazana Namatai Kwekweza, uMnu. Vusumizi Moyo loMnu. Samuel Gwenzi balelungelo lokubhadala isibambiso sebail.
Betheswa amacala okutshengisela phandle kwedale lomthethwandaba bekhonona ngokubotshwa njalo lokuvalelwa entilongweni kwamalunga ebandla leCCC, abagoqela umkhokheli wabo, uMnu. Jameson Timba. Bacatshangelwa lokuthi babefuna ukuqoqa uzulu ukuba atshengisela ngesikhathi kuqhutshwa umhlangano weSADC Summit eHarare.
UTimba labanye bakhe abafika phose amatshumi ayisitshiyangalombili bakhangelelwe ukuba bazamiswa emthethwandaba ngoLwesine kulandela ukuphanyekwa kodaba lwabo emthethwandaba ngamagqwetha la athi akulamkantsho okwethulwe ngumtshutshisi ngokubotshwa kwabo.
Babotshwa bethakazelela usuku lwabatsha olweDay of the African Child ngoNhlangula emzini kaTimba. Kambe kutshoni ukuvalelwa kwabantu bonke laba okugoqela owayemele iBinga Noth edale lephalamende, uMnu. Prince Dubeko Sibanda, okuthiwa watshotshozela udlakela?
UMnu. Effie Dlela Ncube okunhlanganiso yeNational Consumer Rights Association uthi akumelanga kwephulwe ilungelo lalabo ababotshelwa amacala atshiyeneyo.
UMnuMabutho Moyo, okudale leCentral Committee kubandla leZanu PF, uthi ababotshiweyo bazamiswa emthethwandaba lapho okuzathethwa amacala abo.
UMoyo uthi eZimbabwe kulohulumende kazulu hatshi okantandokayiphikiswa njengalokhu okukhulunywa ngabaphikisayo labalwela ilungelo loluntu.