Uzulu wakoBulawayo wamukela ngenjabulo isinqumo sikamansipala walelidolobho sokubayabela amanzi okwensuku ezimbili ngeviki. Lokhu kwenzakala ngemva kokuna kwezulu elinengi lonyaka, amadamu lawo akade esetshile athola amanzi.
Amadamu akoBulawayo abikwa aselamanzi angaba yisilinganiso sokungamatshumi edlula kancane amahlanu ekhulwini (53%).
Isikhulumi sikamanisiphala, uNkosikazi Nesisa Mpofu uchasisa kabanzi ngesilinganiso samanzi emadamu.
“Siyathokoza ukuthi sesiku55% full amadamu ethu nxa sikhangela ama figures angene namuhla,njengedolobho besikhangela ukuthi nxa sihlala edolobheni amanzi kufanele ephume empompini esesikwenza khathesi sikhangela ukuthi insuku esihamba singela manzi singazehlisa njani. Masikhangela i144 hours efakwe izolo sesivulela abantu amanzi kabili ngeviki lokhu kuzasincedisa ukuplaner ngoba siyabe sesikwazi ukuthi leyi indawo ivula nini.”
Umgcinisihlalo wenhlananiso yezakhamizi, eyeBulawayo Progressive Residents Association umnunzana Thembelani Dube uthi bemukela ngenjabulo leli nyathelo lekhansili.
‘’Kuyasithabisa kakhulu ukuthi abantu lokhe bevalelwa amanzi kodwa siyakubonga njalo siyakujabulela ukuthi abantu sebezathola amanzi kabili ngeviki. Siyakhuthaza ukuthi uCity Council aqede umsebenzi wabo wokulungisa amapipes."
Unkosikazi Sikhululekile Moyo uCouncillor kaWard 17 uthi bakhangelele ukuthi kube lohlelo olutsha lokuletha amanzi.
“Ngiyananzelela izakhamizi ziyakhala kakhulu ngamanzi ezinye sezihlale 8 days to 10 days zingela manzi kodwa esikukhangeleleyo njengoBulawayo City Council khathesi besesifakile uhlelo olwe Restoration Strategy Outline ukuthi wonke amalokitshi kuyabesekulelanga labo ukuthi in 7 days amanzi ayabe efika.”
Unkosikazi Mellisa Ndlovu oyisakhamuzi sakoBulawayo uthi besebethwele nzima ngodubo lwamanzi.
“Ukulethwa kwamanzi kuyinto enhle kakhulu ngoba besikhalela ukuthi kuyini okwenza ukuthi bengasiniki izulu lisina kangaka. Khathesi isikhathi esiphakathi kwaso sinzima kakhulu ngomkhuhlane weCovid.”
Ngenyanga edluleyo kaZibandlela izakhamuzi zakoBulawayo zibhalela uhlangothi olukhangela ngezamadamu kanye lamanzi elizweni, olwe Zimbabwe National Water Authority (Zinwa) zidinga ukwazi ukuthi idamu le Gwayi- Shangani lizaphela nini ukwakhiwa ngoba kuyilo okukhangelelwe ukuthi lizaqeda uhlupho lwamanzi koBulawayo. Izakhamizi zibuze njalo imbangela yokuthi amadamu ebe elokhu engagcwalanga khona kwezinye indawo zelizwe amadamu esegcwele.
Umqondisi weMatabeleland Institute for Human Rights (MIHR), umnumzana Khumbulani Maphosa ulandisa ngalokhu.
“Kuviki eliphelileyo sithumele ugwalo lwemibuzo ku Zimbabwe Water Authority sinanzelela ukuthi iZinwa ilomlandu ukuthi ibone ukuthi kulamanzi amanengi avela emadamu lemigodini alethwa koBulawayo. Imibuzo eminengi ibigoqela ukufuna ukwazi ukuthi ukuthi damu leGwayi Shangani liyaphela nini njalo iyalungisa nini emanye amadamu iZinwa.”
Ekhuluma emhlanganweni wekhansili ngoLwesihlanu olwedluleyo uMeya wakoBulawayo umnumzana Solomon Mguni uveze ukuthi amadamu anathisa idolobho leli asekusilinganiso samatshumi amathathu ekhulwini - 30% samanzi, kusukela ngoLwezi nyakenye lapho amadamu ayelamanzi ayisilinganiso samatshumu amabili ekhulwini- 20%.
Umeya uveze njalo ukuthi ikhansili ijonge ukuqala ukupompa amanzi empompini zeFlowserve kusukela ngenyanga kaMbimbitho lonyaka, ethi lokhu kuzakhweza isilinganiso samanzi ahlanjululwa yikhansili kusukela ku 92 ML/day kusiya 145 ML/ ngelanga.
Ngomnyaka odluleyo idolobho lama ukudonsa amanzi emadamu agoqela I Umzingwane, Upper le Lower Ncema ngoba ayesetshile. UBulawayo unatha emadamu ayisithupha.