Izakhamizi zakoBulawayo ezithembe ukusebenzisa amabhasi awenkampani kahulumende eyeZimbabwe United Passenger Company (ZUPCO) alenhlawulo ephansi yokugada kulemitshova, ziphelelwe ngumphako ngoLwesine ngenxa yokusilela kwamafutha ezimota.
Nanka amabhasi koBulawayo okubikwa ukuthi ethulelwa uzulu nguMnangagwa.
Abantu abanengi abasebenzisa amabhasi la basele emigwaqweni bethithibele bengabikelwanga okwenzakala emabhasini eZUPCO.
UNkosazana Sanele Sibanda, ofunda ekholitshini yemfundo ephezulu koBulawayo, uthi ukuswelakala kwamabhasi kwenza ukuthi behlulele ukuya endaweni ezitshiyeneyo.
“Ukuswelakala kwamabhasi kuyasikhathaza kakhulu njengabantwana besikolo ngoba sesihlala sigijima lemisebenzi yesikolo okumele siyeyenza ngekhaya asisayenzi ngoba siyabe sesidiniwe sesibona kungcono ukwenzela esikolo ngoba sifika endlini sekusebusuku njalo kungela magetsi. Ebesikufisa yikuthi uhulumende angenele ngoba lokhu kuyasiphambanisa lezifundweni zethu isikhathi sokubala asisasitholi ngokuthi sima kakhulu silinde ibhasi sifike endlini ebusuku sesidiniwe ukubala kubenzima.”
UMongameli Emmerson Mnangagwa ngosuku esethulela uzulu amabhasi koBulawayo.
UMnu. Melusi Zikhali, omunye olezimota ezisebenza koZupco, uthi ukuswelakala kwamafutha ezimota akubathinti kangako ngoba eyabo imali ibuya njengokuvumelana abakwenzayo.
UMnu. Paul Tshuma, isakhamuzi sakoBulawayo, uthi umangaliswa yikuthi amabhasi amatsha awabonakale emgwaqweni.
“Awungeke uvezele uzulu amabhasi angamatshumi amahlanu singazake sibone yona eyodwa emgwaqweni. Amabhasi akhona bawasa ngaphi? Asedolobheni leHarare na? Thina sesazifundela ukuzigadela lapho okutshiphe khona, ukuzigadela amatruck nge2 bond kulokuya tshona elayinini umelele amabhasi angabuyiyo.”
Omele umgcinisihlalo wenkampani yeZUPCO, uMnu. Anold Rukwezva, walile ukuthatshwa amazwi ethi akalamvumo yokukhuluma kodwa uveze ukuthi bayananzelela iphutha labo lokwehluleka ukwazisa uzulu ukuthi amabhasi kawala mafutha.
Your browser doesn’t support HTML5
Kawabonakali Amabhasi eZUPCO