Amabhanga aphathisa ukwakha lekuthengeni izindlu abalisa iFBC kanye le CBZ Building Societies aseqalisile ukunika abantu izikhwelede zama mortgage loans phezu kokuma uhlelo lolu phose okweminyaka elitshumi kubangelwa yikubhidlika kwenotho kusabusa ibandla le Zanu PF lilodwa.
Amabhanga la abikwa enika uzulu izikhwelede eziqalisela kunkulungwane ezingamahlanu amadollar eMelika kusiya kunkulungwane ezilikhulu zamadola eMelika.
Abantu okumele bathole izikhwelede lezi ngabahola amadola aphezu kwe nkulungwane zamadola eMelika ngenyanga.
UMnu. Walter Nsununguli Mbongolwane ingcwethi ecubungula ezenotho utshele uGibbs Dube we Studio 7 ukuthi abantu abanengi abasoze benelise ukuthola izikhwelede lezi zokwakha kumbe zokuthenga izindlu njengoba kukhanye loluhlelo ngolwabanothileyo hatshi inswelaboya.
