Osomabhizimusi bathi sebemelele baze badinwa ukuthi bathole imali yokuthuthukisa amafekithali ab. Imali le ibekwe eceleni ngoNcwabakazi ngomnyaka ophelileyo esikhwameni sokuthuthukisa inotho kuhlelo lwe Zimbabwe Economic and Trade Revival.
Umqondisi we Zimbabwe National Chamber of Commerce uMnu. Trust Chikohora uthi imali le kwakumele ukuthi osomabhizimusi bayithole kusanda kubunjwa lesisikhwama libhanga le Africa Export and Import Bank kanye lohulumende.
UChikohora uthi osomabhizimusi bamelele imali le ngamehlo abomvu njengoba kulabanye abesaba ukuthi amabhizimusi abo angabhidlika nxa bengayitholanga.
Ibhanga le Africa Export and Import Bank libumbe lesisikhwama lohulumende esibikwa silezigidi eziyisikhombisa zamadola eMelika.
Imali le kumele ibolekwe osomabhizimusi abazayithola emabhanga akhethwe nguhulumende.
Kodwa-ke banengi osomabhizimusi abathi kabazi lutho ngemali le okumele ukuthi nga seyatholwa ngabanye babo eHarare abayilonda kudala emabhanga.
Usomabhizimusi wako Bulawayo uMnu. Matson Hlalo njalo omele iMzilikazi edale leSenate uthi osomabhizimusi abajayele ukuthola imali enje yizinothi ze Harare hatshi abantu makhaza ikakhulu abase Nkabazwe le Matabeleland.
