Ngesikhathi eleSouth Africa lithakazelela uzibuse ngoLwesibili, izizalwane zeZimbabwe labamabandla azo ezombusazwe abaseSouth Africa bathi kunengi ilizwe labo elingakufunda kumakhelwane ngendlela aqhuba ngayo ezombusazwe lezamalungelo oluntu.
Sekuyiminyaka engamatshumi amabili lesikhombisa (27 years) iSouth Africa ithole uzibuse. Zinengi izikhalo ezethulwe yizizalwane zakweleSouth Africa ngaleli langa. Abanengi bathi balokhu bengelazindlu emadolobheni, bengelamhlaba ongowabo emaphandleni.
Abanyeke bebekhala ngokusweleka kwemisebenzi njengoba abangasebenziyo sebefika kusilinganiso sokungamatshumi amathathu lambili ekhulwini (32.5%). Bakhona njalo abebekhala ngokuthi labo abakhethwe ukuletha inhlelo zentuthuko bayazitika ngemali kazulu.
Kodwake abamabandla ezombusazwe eZimbabwe kweleSouth Africa bathi lobanje kukunengi izakhamizi ezikhala ngakho, kunengi abakuhawukelayo osekulethwe yinkululeko yeSouth Africa kuzizalwane zayo.
Unobhala jikelele webandla leZimbabwe Communist Party umnumnzana Ngqabutho Mabhena, uthi iZimbabwe yehluleke kakhulu nxa kuqathaniswa leSouth Africa.
“EZimbabwe sathi sithole uzibuse sile 27 years sasilokhu silomongameli oyedwa. Sathi sile 27 years kwakube lempi yombuqazwe. Sathi sile27 years umnotho watshabalala. Lapha asikaboni kusiba lombuqazwe eSouth Africa.”
Isikhulumeli sebandla leZapu kweleSouth Africa umnumnzana Cannicious Nkala uthi bafisa kakhulu ukuthi iZimbabwe ifunde ukuthi amalungelo oluntu ahlonitshwa njani.
“Kunengi esikubona iSouth Africa ikwenza kahle like ama human rights issues iwaphethe kahle. Lendlela ephatha ngayo izizalwane zayo in terms of imisebenzi iya protector imisebenzi for izizalwane zayo . lakho ukuthi kwesinye isikhathi siyabona belungisa indaba zecorruption belalela labantu lamacourts abo enikeza ama favourable judgements ebantwini even against government officials.”
Unobhala jikelele webandla le The Patriotic Front umnumnzana Andrew Nyathi uthi umehluko omkhulu phakathi kweSouth Africa leZimbabwe yikuthi eZimbabwe kwaphela umbuso wamabhunu kodwa inkululeko lozibuse akutholakalanga.
“Inkululeko kayibuyanga ngendlela yokuthi abantu bakhululeke bakhulume lokhu abakubonayo, abakuthandayo abakufisayo. Bakhulume bakhethe ngendlela abafuna ngayo. Kuleli ilizwe laseSouth Africa abantu bakhululekile bakhuluma loba yini akekho umuntu ozakugijimisa kumbe afune ukukucatshisa.”
Unobhala jikelele webandla le Mthwakazi Liberation Front umnumnumnzana Chrispen Nyoni uthi ngesikhathi iZimbabwe isiba leminyaka engamatshumi amabili lasikhombisa kuyesabeka okwasekonakele.
“Yayivele isilamacala amanengi ngokubulala abantu beSiNdebeleni kumbuqazwe. Yayivele isingenwe yimvukuzane yobusela, imvukuzane yokuzonda esinye isizwe, imvukuzane yokwenza zonke izinto ezimbi. Basebegraduatile inengi labo.”
Le yinto egcizelelwa yisikhulumeli sebandla leMthwakazi Republic Party umnumnzana Velile Moyo.
“Imithetho eyayisetshenziswa ukuhlukuluza abantu abamnyama yiyo esisetshenziswa lamhlanje ukusihlukumeza nathi. Ukusisusa ezindaweni zethu imarginalisation, Ukubandlulula, ukukhethana ngobuhlobo. Lokhu okwakusenziwa ngabelungu yikho osekusenzakala. IZimbabwe ayizange ilungise uma ingena ku Independence. Ungakhangela inkantolo kusafananje nalezi ezikaSmith regime.”
Kodwake ngesikhathi uMongameli Emmerson Mnangagwa esethula inkulumo yakhe ngelanga lokunanza uzibuse waseZimbabwe kumalanga ambalwa asanda kwedlula uthe uyathokoza ngokuthi iZimbabwe ithakazelela iminyaka engamatshumi amane lanye sekukunengi kakhulu ekwenze kuhle selokhu yathola uzibuse.
Your browser doesn’t support HTML5
Udaba lokuthakazalela uzibuse waseSouth Africa siluphiwa nguThuso Khumalo