Icele le MDC elikhokhelwa nguMnu. Welshman Ncube lele MDC-Renewal abeomhlangano edolobheni lako Bulawayo. Lumhlangano uyisivumelwano esalotshelwana phansi esokuthi ngemva kokuvumelana ukumanyna kwamabandla la okwenzelwa eHarare kumele amabandla la enze umhlangano endawonye labasekeli koBulawayo.
Inkokheli yamabandla le ithethe lelithuba ukusola uMnu. Morgan Tsvangirai. Unobhala jikelele webandla le MDC-Renewal Team uMnu. Tendai Biti utshele lumbuthano ukuthi uMnu. Tsvangirai wacitha isikhathi sabo ezenza umuntu ongakhokhela kodwa ubukhokheli engelabo.
“Umanyano wamabandla eMDC yiwo kuphela ozeletha ububelo elizweni,” kutsho uBiti abantu beqa batshaya impululu.
Umkhokheli weMDC uMnu. Ncube yena uthe ekusungulweni kwebandla le MDC ngomnyaka ka 1999 osenguye okhokhela ibandla le MDC-Renewal Team uNkosikazi Sekai Holland wabaluma indlebe wathi uMnu. Tsvangirai kasomkhokheli woqotho kodwa bona bathi hatshi.
Amabandla la akhangelelwe ukwenza umhlangano wokucanda indlela yokumanyana ngenyanga ka Mabasa lapho okuzasungulwa isisekelo sombuso sebandla elimnyeneyo.
Phansi komhlandlela lo owalolongwa ngomnyaka ophelileyo amabandla omabili ayemele anikeze amagama enkokheli zawo zezigaba zonke zelizwe kodwa akucacanga ukuthi lokhu besekwenzakele na emhlanganweni wange Sonto.
Amabandla la amele ahlangane njalo ngenyanga ka Ncwabakazi lapho okuzakhethwa khona inkokheli ezangena kukhetho.
Kodwa okwakathesi amabandla la akhangelelwe ukusebenzelana ndowanye phansi kwegama elithi United MDC.
Sixoxe lomgcinisihlalo we MDC Renewal Team, uMnu. Sam Sipepa Nkomo osilandisele ngomhlandlela wokumanyana lo.
Your browser doesn’t support HTML5
Ingxoxo loMnu. Sam Sipepa Nkomo