Inkokheli yamabandla eMovement for Democratic Change (MDC) ngoLwesine ikhalale ukuya emncwabeni kamuyi uMnumzana Ephraim Sango Masawi.
Inthatheli zindaba yeStudio 7 uMavis Gama ubika ukuthi bavela batsho ekuqaleni ukuthi kabasoze bahambe kulumncwabo nxa umufi engaphiwa inhlonipho yeqhawe lelizwe.
Abe MDC bathi benze lokhu ngoba kusobala ukuthi linhlonipho iphiwa labo ababesempini yenkululeko bekubandla le Zanu PF njalo nxa umuntu ethe waba lombono owehlukane lowabo kabekwa kulindawo ngoba ethiwa ungumthengisi.
Kusobala ukuthi izenzo zebandla le Zanu PF sezicunule uzulu othi sokumele kufulathelwe indawo ye National Heroes Acre kulungiswe ezinye indawo lapho okuzalahlelwa khona amaqhawe oqobo.
Kambe kumele kwenziweni njengoba amabandla eMDC akuhulumende womanyano esekhalale ukuya eHeroes Acre?
UMnu. Moses Mzila Ndlovu umsekeli womphathintambo wezokudlelana lamanye amazwe lo Mnu. George Mkhwanazi ingcwethi kwezombusazwe bathi uzulu sokumele abe lamacebo amatsha okungcwaba amaqhawe endaweni ezitshiyeneyo ezinje Matobo Hills lapho okulele khona iNkosi uMzilikazi lenduna zika Lobengula kaMatshobana.
