Abamabandla ezombusazwe bakhala ngokudatshulwa kwamaphepha abawanamathisela ezihlahleni kanye lemidulini bekhankasa.
Lokhu bathi yisenzo esiphambana lemithetho yelizwe leyafakwa yikhomishini eye Zimbabwe Electoral Commission (ZEC).
Abamabandla ezombusazwe laba bathi amaphepha lawa bayawabhadalela njalo bezwa ubuhlungu ngokudatshulwa kwawo.
UMnu. Nkululeko Tshuma, okhankasa eInsiza South esabelweni seMatabeleland South emele umanyano we People’s Rainbow Coalition, uthi balohlupho kumaposters abo ngenxa yokudatshulwa.
“Silohlupho lokudatshulelwa amaposter, amanye amabadla afike adabule afake okwabo, luhlupho esilalo lokuthi abanye abahloniphi amanye amabandla kodwa sasayina phansi iCode of Conduct yeZEC sivuma ukuthi asisoze sidabule amaphepha.”
UTshuma wengeze ethi basalungiselela ukuhambisa isikhalazo sabo eZEC. “Sisesibangeni sokuthi sihambise isikhalazo lesi eZEC ngoba amaphepha lawa awadojwa kodwa ayabhadalelwa.”
Mnu. Josphat Mzaca Ngulube, okhankasa ezimele eBulawayo South, uthi laye uthwele nzima ngokudatshulelwa amaphepha akhe ethi njalo amapholisa awathathi nyathelo ngalokho.
“Kuyinto engalunganga ngoba kuzavusa ubudlwangudlwangu, ngoba angila donor. Ngiripotile emapholiseni kodwa yinto eyenzekala amapholisa ekhona. IZEC yiyo eyafaka umthetho kodwa amapholisa.”
UNkosikazi Naki Mawaro, owebandla le ZIP okhankasa eBulawayo Central, uthi yena kakabi lohlupho lokudatshulelwa amaphepha akhe okukhankasa.
“Mina awami ukukhuluma iqiniso engiwafakileyo akhona kawadatshulwanga.”
Insuku zokhetho ziyazisondela njalo ubudwangudlwangu lodlakela sokuqalile endaweni ezehlukeneyo zelizwe okugoqela ukuphoselwa kokunakanelwa ukuba libhomba embuthanweni wokukhankasela usekelo oweZanu PF koBulawayo ngempelaviki edluleyo.
Your browser doesn’t support HTML5
Udaba Esilethulelwe NguBathabile Masuku