Uzulu sekhuthazwe ukuxoxisana edinga indlela yokulahlwa kwezitshubo ezisetshenziswa kanye, ama diapers ngeSilungu, ngoba abezemvelo sebethe kungangcono kumiswe ukusetshenziswa kwezitshubo lezi andubana kutholakale indlela eqondileyo yokuzilahla.
Manengi ama pampers alahlelwa egangeni ...
Kulemibiko ethi omama abamunyisayo abalahli ngendlela eqondileyo izitshubo lezi, okwenza izinja ziyevumbulula ingcekeza le. Okunye njalo osekuvelile yikuba izitshubo lezi aziboli kalula ngakho zilakho ukungcolisa imvelo okwesikhathi eside lanxa zigqitsheliwe.
Uzulu sekhuthazwe ukuba axoxisane ngodaba lolu kutholakale amaqhinga ngokuphangisa.
UNkosikazi Amkela Sidange, oxwayisa ngezemvelo njalo eyisikhulumeli senhlanganiso yeEnvironmental Management Agency, uthi udubo olukhulu elizweni ngolwengcekeza yezitshubo ezilahlwayo ezigoqela ingcekeza.
Amanye ama diapers alahlelwa egangeni
“Uzulu sephatheke kakhulu ngokulahlwa mahlayana okwezitshubo zakulezi insuku okubizwa kuthiwa ngama pampers. Yebo kambe ludubo olutsha akade singalukhangelelanga eminyakeni edlulileyo lapho inengi labantu belivele lesebenzisa izitshubo zamalembu lezi ezaziwatshwa. Kodwa okwakhathesi ngenxa yamapampers la sesibona silodubo olukhulu ngoba ungananzelela eZimbabwe ukuthi ingcekeza esesiyifica kakhulu yiyo eyama pampers njalo ama pampers wona ngokwawo ayingcekeza leyana engabambekiyo ngoba egoqela ingcekeza.”
UNkosikazi Sidange uqhubeke esithi bayakhuthaza ukuba izitshubo ezilahlwayo zisuswe nxa kungatholakalanga indlela efaneleyo yokuzilahla.
“Thina njengabemvelo siyakhuthaza kakhulu ukuthi nga kubakhona ukuthi mhlawumbe la amapampers asuswe kumbe abantu babelendlela mhlawumbe okokuthi angalahlwa njani ngoba ezikhathini ezinengi uyafica ukuthi amapampers alahliwe mahlayana adonswa yizinja njalo njalo ngakho asinanzelenini ngoba abaziyo ngawo bathi awaboli alakho ukuhlala okwesikhathi eside.
“Ngakho besesisiba lombono okuthi mhlawumbe njengozulu siqalise ukuthi sixoxe ngawo sizuze isu lokuthi singawaphatha njani,yikho thina sesihambela phambili sisithi mhlawumbe kawasuswe amapampers.”
Ama pambers asexhaphozini ...
Esinye isakhamuzi sako Bulawayo, uNkosikazi Regina Mpofu, uthi kudala babesenzisa izitshubo njalo bafundiswa ukuba ingcekeza yomtwana ayilahlwa mahlayana nje.
“Amapampers awakho right ngoba thina kudala sasisebenzisa izitshubo. Isitshubo senza umtanakho abe healthy ngoba uyamwatshela usi ayine isitshubo lesiyana. Ipamper khathesi umuntu uyayekela ipamper ihlale more than 2 hours umtwana elokhe egqokile ipamper leliyana. Isitshubo kwakungenzeki umtwana engaba manzi uyakhala. Thina satshelwa ngabomama ukuthi idoti yomtwana ayiphombu kulahlwa ihambe inyathelwa ngabantu kuyenza umtwana angakhuli kahle. Abakhathesi bayalahla yonke ndawo sokusinika umkhuhlane futhi.”
Loba kulabanye abavumelana lokumiswa kwezitshubo ezilahlwayo, kulabanye njalo abangaboni kufanele ukuthi kumiswe ukusetshenziswa amapampers.
Omunye walabo nguNkosikazi Linda Zulu othi izitshubo lezi ezilahlwayo bezilusizo ngoba amanzi ayasilela koBulawayo.
“Bakithi indaba yamapamper leyi inzima sibili ngoba izinto zinzima khathesi ezindlini kuyabe kungela manzi sebesitshela ngokuthi amapamper awasavunyelwa sibona angani kuzasinzimela thina abanye. Amapamper abesinceda kakhulu kakhulu sebesibisela emuva kakhulu kundaba yamanappies leyi indaba yamanappies izasihlupha kakhulu ngokubona kwami khathesi kuzasihlupha kakhulu amanzi ayabe engekho ahamba iviki yonke. Amapamper abesinceda kakhulu engxenye abantu bangalungisisa endabeni yobutshapha but sokuzasihlupha sibili.”
Ukusetshenziswa kwezitshubo lezi ezilahlwayo sokuleminyaka embalwa kuqalile eZimbabwe.
Your browser doesn’t support HTML5
Abalondoloza Ezemvelo Bathi Sokumele Kuvinjwe Izitshubo Zama Diapers