Kuvamile minyaka yonke ukuthi ngesikhathi sekhefu lekhisimusi kuphithizele emngceleni weBeitbridge, izizalwane zeZimbabwe ezihlala kwele South Africa seziphindela emakhaya ukuyabonana lezihlobo labangane.
Indwendwe zivame ukuba zinde okwesabekayo kulumngcele abantu becine beqeda imihla lamalanga bemelele ukuthi badindelwe izincwadi zabo.
Kodwa lokhu kungaba yinto yayizolo lonyaka kulandela ukungenela osokwenziwe yiwofisi kaMnu Gorden Moyo, yena ongumphathintambo obona ngokwenzakala emawofisini enhloko kahulumende uMnu Morgan Tsvangirai.
UMoyo uthi wethekelele kulumngcele ngoMvulo lapho akhulumisane khona leziphathamandla zenhlangothi ezitshiyeneyo ezibona ngokuhamba kwabantu bavumelana ukuthi kususwe izigwenxa ezivame ukubangela indwendwe ezinde kulumngcele.
Silokhu sikudaba oluphathelane lezizalwane zeZimbabwe ezikwamanye amazwe, ngolweSithathu siphathe udaba lwemizamo enziwa nguhulumende, eyokudinga ukuhlawulisa abantu laba umthelo ukuze beqhubeke beyizizalwane zeZimbabwe lokuthi benelise ukuvota.
Lokhu kuphume kugwalo olwethulwe ngumphathintambo wezemali uMnu Tendai Biti ekuqaleni kweviki eLondon. Abahlala kwamanye amazwe kabavumelani ngalokhu. Kodwa bayavumelana uuthi lokhu yindlela kahulumende yokudinga imali.
Ukuhlaziya udaba lolu, sixhume ingcwethi ecubungula ezombusazwe, uMnu Brilliant Mhlanga ohlala eBritain lomkhokheli weAssociation of Zimbabweans Based Abroad uMnu Dumaphi Mema ohlala America.
UMnu Mhlanga usekela imizamo kahulumende le, kodwa uMnu Mema uyayiphikisa esithi uhulumende kumele edinge imali ngezinye indlela hatshi ngokuthi ehlawulise izizalwane zeZimbabwe ezikwamanye amazwe umthelo.