Kulezizalwane zeZimbabwe ezithi ilizwe leli akumelanga likhokhele umanyano weSouthern African Development Community kumbe iSADC ngoba kubikwa ukuba lephula ilungelo loluntu.
Kodwa kulabanye njalo abathi Banengi abathi akumelanga uMongameli Emmerson Mnangagwa aphathe isikhundla somgcinisihlalo womanyano lo ngoba uhulumende wakhe ubopha mahlayana abalwela ilungelo loluntu labaphikisayo.
Bathi ukubotshwa lokukhahlanyezwa kwabantu abedlula ikhulu lamatshumi ayisithupha – 166, abagoqela amalunga ebandla leCitizens Coalition for Change, abalwela ilungelo loluntu labanye kwephula iziqondiso zeSADC Treaty, evikela bonke abantu njalo ebanika amalungelo okutshengisela ngokuthula lokulwela abakufunayo kwezombusazwe lokunye.
Omunye wabalombono lo nguMnu. Buster Magwenzi, owalwa impi yenkululeko ekuviyo leZimbabwe People’s Revolutionary Army.
"Sonke ezweni lomhlaba jikelele uyazi ukuthi kunengi okungahambi kuhle eZimbabwe njalo ukukhokhela iSADC kulizopho lobanje kukhona esingasuthiseki ngakho ngohulumende, uzaphatha ngoba kulizopho lakhe akumangalisi ukuthi sesingenza sengathi senze into emangalisayo ngoba sesake sayiphatha kuminyaka edlule asibonanga lutho olumangalisayo ngakho."
Lokhu kusekelwa ngu Nkosikazi Patricia Tshabalala othi kumele eleZimbabwe liziqoqe lilungise njalo ubudlelwano lamanye amazwe ngoba konakele elizweni.
"Kuhle sizaphatha okomnyaka kodwa sonke siyazi ukuthi asiselabudlelwano obuhle lamanye amazwe ngesizatho sokuthi uhulumende okhona wephula amalungelo oluntu sibisawo wonke, kodwa kumqoka ukuba azihluze atahiyane lokuxopha amanye amazwe alungisise ubudlelwano lokudinga usizo lokudla kumazwe angomakhelwane."
Isakhamuzi sakoBulawayo uMnu. Ben Moyo uthi akulalutho oluzaguquka eZimbabwe ezaphatha isikhundla somgcinisihlalo weSADC.
"IZimbabwe ikeyaphatha lesisikhundla ngesikathi sikaMugabe asizange sibone lutho oluhle phoke kuloMnangagwa ovele abantu bekhonona ngombuso wakhe angiboni sizatholalutho njengezakhamizi zakoBulawayo okungathuthukisa impilo zethu."
Osakhulayo olwela amalungelo oluntu, uMnu. Benon Ncube, laye uthi akulanguquko ezakwenzakala eZimbabwe, ezaphatha isikhundla somgcinisihlalo weSADC okomnyaka owodwa. Uthi inhlanganiso le kayiqedakali lokuthi yenzani kwezombusazwe, ikakhulu ekulungiseni okufiswa nguzulu.
"Bonke akade belethemba lokuthi iSADC izalungisa izikhalazo sekusobala ukuthi akukho okuzalunga ngoba iSADC isiyehlulekile ukusimela izaphatha njani loluhlupho esimsolayo esengumgcinisihlalo wayo."
Olwela amalungelo ezizalwane zeZimbabwe ekwele South Africa, uAdvocate Dumisani Nleya, uthi uMnangagwa akumelanga akhokhele iSADC.
"Sonke siyazi ukuthi iSADC yakhupha umbiko ngaphansi kogatsha lwayo olwaluqopha ukhetho ukuba aluhaambanga kuhle njalo uMnangagwa akumelanga abuse eZimbabwe, siyadana uma sebezomupha isihlalo sokuthi abakhokhele kukanti iizizalwane laye wonke umuntu uyasola. AbeSADC bakwenzenjani ukuvuma lobabekumele kuphathe iZimbabwe bekumele badale ikhomidi ezakhokhela hatshi uMnangagwa ngoba kulekungavumelano lombuso wakhe wephula amalungelo oluntu mahlayana."
UMnu. Gift Ostallos Siziba, okunhlanganiso ebunjwayo eyeBlue Movement, usekela amazwi kaNleya.
"Uma iSADC iqotho bekungamelanga ivumele uMnangagwa ukuba aphathe ngoba iyazi ukuba silensolo enkulu ngaye njalo layo iyakusekela lokho ngogwalo abaluloba ngempumela yokhetho lomnyaka odlule futhi ayisithi sodwa esasola indlela athi wanqoba ngayo. Bamupha kanjani ukuthi akhokhele okutsho ukuthi izikhalazo zethu seziyize asiselathemba ngeSADC."
Kodwa abakubandla leZanu PF bathi uMnangagwa ulelungelo lokuphatha isikhundla lesi loba kulabanye abakhonona besithi wephula ilungelo likazulu. UMnu. Admire Tonderayi Masikati, uthi kunengi okuhle okuzakwenzakala eZimbabwe uMnangagwa engaphatha isikhundla lesi.
"Ukuthatha isikhundla sokubangumgcinisihlalo weSADC kuzanceda kakhulu eleZinbabwe ngoba kuzakubalentuthuko emangalisayo kwezakhiwo ezehlukeenyo, amabhizimusi azathuthuka njalo kuzadala ubudlelwano obuhle lamanye anzwe, kunengi esizakuthola ngeke sikubalise sikuqede."
Text: Ukhansila kaWard 26, uMnu. Mpumelelo Moyo okhokhela ikhomithi yezemali kukhansili yakoBulawayo, ulombono ofanayo.
"Ilizwe lizasala lilentuthuko emangalisayo ngibone isilindo sendizamtshina esigodlweni sesihambelana lamazwe athuthukileyo kuthi lemigwaqo iyalungiswa, isigodlo sizasala sibukeka kulentuthuko."
Abaphikisayo labalwela ilungelo loluntu bathi uhulumende kaMnangagwa ukhahlameza uzulu njalo waqhuba ukhetho olwalungakhululekanga nyakenye okuyinto ehlupha abantu beZimbabwe.
ISADC, European Union lezinye inhlanganiso zachothoza indlela ukhetho olwaqhutshwa ngayo eZimbabwe zisithi kunengi okonakalayo ngesikhathi abantu bevota njalo lokuswelakala kwamaphepha okuvota lokubalwa kwamavoti.
UMnangagwa lezinye iziphathamandla zikahulumende bathi bazajezisa kabuhlungu abafuna ukutshengisela emigwagweni bekhonona ngendlela ukhetho olwaqhutshwa ngayo nyakenye ngoNcwabakazi. Abanye asebebotshiwe abagoqela uMnu. Robson Chere, owenhlanganiso yababalisi eyeAmalgamated Rural Teachers’ Union of Zimbabwe, batshaywa kabuhlungu ngamacatshangelwa ukuba ngamapholisa ensitha.
SEE ALSO:
Udaba esilwethulelwa nguAnnahstacia Ndlovu