Ilunga ledale lephalamende kwele Bhilithane, uNkosikazi Kate Hoey, uthi izijeziso zenotho ezafakelwa abalandeli bebandla leZanu PF kumele zingesulwa okwamanje ngoba akukakanyi okwenziwa libandla elinqobe kukhetho olusanda kwenziwa eZimbabwe.
UNkosikazi Hoey, okubandla lezisebenzi eleLabor Party njalo obekwele Zimbabwe kungakenziwa ukhetho ngaphansi kwenhlanganiso yeCommonwealth Parliamentary Association, uthi kukhanya engani kubelokhuthula ngesikhathi sokhetho obekusenzelwa ukuvala abantu amehlo.
Your browser doesn’t support HTML5
Ingxoxo Esiyenze LoNkosikazi Kate Hoey
“Kulokhu esisanda kwethula (Commonweath Parliamentary Association) sithi akumelanga sihle sesule izijeziso zenotho. Lokhu sikutsho ngoba kumele kukhanye ukuthi kwenzakaleni kwele Zimbabwe. Kumele kube lomehluko okhanyayo. Siyabona ukuthi kwaba lomehluko kodwa kunengi okumele kwenziwe.”
Kodwa-ke UMnu. Believe Gaule, okubandla leZanu PF, uthi akumangalisi okwethulwe nguNkosikazi Hoey ngoba ilizwe leBhilithani lokhe libuhlungu ngokuthathelwa ubukhosi ngabantu abansundu kwele Zimbabwe.
“Siyakwazi ukuthi yikho lokhu obekusengqondweni zabo ngoba babuhlungu ngokuthathelwa ilizwe leZimbabwe ngabantu abamhlophe. Abakwenzayo kuyafana lokuthi nxa abantu bedlala inguqu kubelabanye abahluthuna intuba lapho okuhlohlwa khona. Bakujayele lokhu.
“Kumele bahloniphe ukuthi siqhube ukhetho olubalulekileyo. Balenhloni okumangalisayo ngoba sinze abakade bengakucabangeli.”
Ebuzwa ngamasotsha abulele abantu eHarare ababetshengisela bekhonona ngokuphuza kwekhomishini yeZimbabwe Electoral Commission ukuthi yethule impumela yokhetho lukamongameli, uGaule uthe uMnangagwa uthi uzakulungisa lokhu ngokuhlolisisa udaba lolu.
IZEC yathi uMnangagwa wanqoba kukhetho lolu kodwa lokhu kuphikiswa ngumanyano weMDC Alliance ethi yibo abanqonayo.
Ilizwe leBhilithane elikumanyano weEuropean Union, eleMelika lamanye ambalwa afakela owayengumongameli uMnu. Robert Mugabe labanye bakhe izijeziso zenotho.
Amazwe la athi uMugabe labanye bakhe bephula ilungelo lolungu njalo baqhuba ukhetho olungaqedakaliyo.