Umsekeli kamgcinisihlalo weAfrican Union Commission selandule imbiko ethi iziphathamandla zalinhlanganiso zifuna uMongameli Robert Mugabe aqhubeke engumgcinisihlalo lanxa ubukhokheli bakhe bucina ngoMgqibelo.
Imbiko le yethulwe lilunga leZanu PF edale lephalamende uMnu Kindness Paradza ngemva kokwethekelela eEthiopia lamanye amalunga ephalamende izolo.
UParadza utshele umsakazo kahulumende ukuthi inengi leziphathamandla zeAU lifuna uMugabe ephiwe ihlandla lesibili lokukhokhela linhlanganiso lanxa umgcinisihlalo evunyelwa ukukhokhela okomnyaka owodwa kuphela.
UMnu Paradza thi uMongameli Mugabe wenze umsebenzi omuhle kakhulu njengomgcinisihlalo, yikho abanye besithi kumele avunyelwe ekulesisikhundla.
Kodwa umgcinisihlalo weAU Commission uMnu Erastus Mwancha utshele iStudio 7 ngoLwesine ukuthi ingamanga aluhlaza imbiko ethulwa nguParadza.
Amazwi kaMnu Mancha la eza ngesikhathi uMugabe esuke elizweni esiya emhlanganweni weAU kweleEthiopia lapho akhangelelwe ukubisela intambo zombuso.
UMongameli wakweleDRC uMnu Joseph Kabila nguye okhangelelwe ukungena kulesi sikhundla.
Abachothoza umbuzo kaMugabe bathi akulalutho olukhanyayo alufezileyo njengomgcinisihlalo weAU nanku izimpi ziqhubeka eAfrica kanye lezinye izehlakalo ezifana lobuyanga lokunye.
Kodwa abanye bathi kunengi akufezileyo.
Ukuhlaziya loludaba sixhume ingcwethi kwezombusazwe uMnu Rejoice Ngwenya lelunga leZanu PF edale lephalamende uMnu Joseph Tshuma.
Your browser doesn’t support HTML5
Ingxoxo loMnu Rejoice Ngwenya loMnu Joseph Tshuma