Inhlanganiso ezizimeleyo sezikhuthaze abakhokheli bamabandla akuhulumende womanyano ukuthi bakhulumisane lenkokheli yebutho lamapholisa ukuba ingaze yangenela kwezombusazwe.
Inhlanganiso lezi, zisebenza ziphansi kophiko lweHuman Rights NGO Forum zithi uMongameli Mugabe, uMnu Morgan Tsvangirai kanye loMnu Arthur Mutambara kumele bahlale phansi labe butho babalaye ukuba akumelanga bangenele kundaba zokhetho lezombusazwe.
Abakhokheli bebutho babikwa beyibo abavimba ingqubelaphambili eZimbabwe ngoba bengafuni ukuba iZanu PF isuke esikhundleni besesabela ikusasa labo nxa iMDC ingangena embusweni.
NgeSonto khona kulamasotsha angamakhulu amahlanu atshengiseleyo eMasvingo esithi afuna uMugabe abuse kuze kubenaphakade.
Le yinto esolwa kakhulu ngabenhlanganiso ezizimeleyo kanye lozulu, besithi amasotsha kamelanga engenele kwezombusazwe.
Ingcwethi ecubungula ezombusazwe uMnu Bhekilizwe Ndlovu utshele Studio 7 ukuthi akusoze kusebenze lanxa kungaze kukhulunyiswane lenkokheli yebutho.