Akukabekwa usuku lokuphenduka ekhaya kuka Dokotela Peter Magombeyi olukhu eselatshwa kwele South Africa loba sowakhutshwa esibhedlela.
UDokotela Magombeyi walile ukukhuluma leStudio 7 ngodaba lolu esithi kumele umsakazo lo uxoxisane ngalokhu lamalunga enhlanganiso yeZimbabwe Hospital Doctors’ Association kanye lamagqwetha akhe. Kasenelisanga ukukhuluma ngodaba lolu lamagqwetha akhe.
Isikhulumeli senhlanganiso yabodokotela, uDokotela Masimba Ndoro, uthi akwaziwa ukuthi uDokotela Magombeyi uzabuyela nini kwele Zimbabwe.
UDokotela Ndoro uthi okwamanje uDokotela Magombeyi welatshwa okutshiyeneyo ehlezi endaweni angafisanga ukuyethulela uzulu esithi lokhu besesaba ukuthi engadingwa yilabo abamthumbayo abacatshangelwa ukuthi badlelana lohulumende wakwele Zimbabwe.
Kubikwa ukuthi wahlolwa umzimba wonke kulandela ukwehluleka kwakhe ukucabanga kahle ngokwamehlelayo ngesikhathi ethunjwe ngabantu abangaziwayo. Wathunjwa okwamalanga ambalwa.
Kwaba lokuxokozela esibhedlela seAvenues Clinic eHarare ezama ukuyahlolwa kwele South Africa uhulumende esithi kulabanye abantu ababefuna ukumthumba njalo wayengaphilanga kahle okokuthi engahamba emazweni.
Kusenjalo, uDokotela Ndoro uthi sebelobele incwadi umthethwandaba weLabour Court becela ukuthi wethule izizatho zesinqumo esokuthi odokotela abakhalala umsebenzi kumele babuyele emsebenzini.
Uthi bazaphanyeka udaba lolu emthethwandaba weSupreme Court bengathola izizatho lezi. Okwamanje, uDokotela Ndoro uthi odokotela bazihlalele ngekhaya.
Kasenelisanga ukukhuluma ngodaba lolu loDokotela Paulinus Sikosana, umgcinisihlalo wohlangothi lweHealth Service Board, kanye loDokotela Obadiah Moyo, umphathintambo wohlangothi lwezempilakahle akade bengaphenduli omakhalekhukhwini.