Kunanzwe usuku lokukhumbula abantu abanyamalaliswayo emhlabeni jikelele ngoLwesihlanu, olweInternational Day of the Victims of Enforced Disappearances, inhlanganiso ezilwela amalungelo oluntu zisithi uhulumende weZimbabwe usalomlandu wokwazisa uzulu ukuthi owayekhankasela umbuso wentando kazulu uItai Dzamara wathunjwa ngobani lokuthi usaphila na.
Inhlanganiso lezi zigoqela eyeCrisis in Zimbabwe Coalition, Zimbabwe Lawyers for Human Rights kanye leyeAmnesty International, yona ethi kumele kubunjwe ikhomishini ezimeleyo ekhokhelwa ngumahluli wenkantolo ezaphenya loludaba.
UDzamara wathunjwa eHarare libalele ngabantu abanakanelwa ukuthi ngabacuphi bakahulumende ngesikhathi kusabusa umuyi uMnu Robert Mugabe ngo2015 wanyamalala kokuphela.
Abanye ababekhankasela umbuso okhululekileyo abanyamalalayo bagoqela uMnu Paul Chizuze loPatrick Nabanyama.
Igqwetha uMnu Pardon Tapfumaneyi utshele iStudio 7 ukuthi ngempela uhulumende kaMongameli Emmerson Mnangagwa kuvele abumbe ukhomishini ezaphenya udaba lukaDzamara ngoba umndeni wakhe ulelungelo lokwazi ukuthi watshonaphi.
Your browser doesn’t support HTML5
Ingxoxo loMnu Pardon Tapfumaneyi