Uzulu weZimbabwe uthi ukhathazekile ngokwenza kukahulumende, kokutshengisa ukubangabi lendaba lozulu, ngoba engamnakekeli lapho ehlelwe yingozi. Lokhu kuphuma ngemva kwengozi zempopoma zamanzi ehlasele ezinye izigaba zelizwe, kungekho okukhanyayo okwenziwayo ukunceda abehlelwe yilezi ngozi. Abenhlanganiso ephathisa ngesikhathi sengozi eye International Red Cross of Zimbabwe bathi sebekhulumisana labakwamanye amazwe ukudinga usizo lokuphathisa uzulu osehlelwe yile ingozi.
Uzulu okhulumisane le Studio Seven uthi umangaliswa yikwenza kukahulumende ukuba akasukumeli phezulu ukusiza abantu sikhathi sonke nxa ilizwe lithe lehlelwa yingozi efana leyempophoma zamanzi esezihlasele izigaba ezibucwadlana lomfula u Zambezi kakhulukazi ezigabeni ezibalisa Mashonaland West le Mashonalend Central.
Uthi uzulu lokhu kwenza kukahulumende kungabajabulisi ngoba kungesi kwakuqala ukuba akhale ngemali sikhathi sonke nxa ilizwe lithe labhekana lengozi ikanti kumele ngabe ufunda kuzehlakalo zeminyakeni yangemuva okufana lengozi eyabangelwa lizulu likazamcolo okunje ngele Cyclone Eline ngomnyaka ka 2000 leyedamu leTokwe Mukosi nyakenye.
Umnumzana Garikai Sibanda oyisakhamuzi se Sunningdale e Harare utshengise ukukhathazeka phezu kwezehlakalo ezifana lezisanda kwehlela ilizwe lapho impophoma zamanzi sezibangele umonakalo kuzakhiwo, lokulahleka kwemiphefumulo yabantu.
Okuyinto esekelwe ngumnumzana Masimba Kuchera wasemzini weChadcombe eHarare yena obeka uhulumende munye umlandu wokungafundi lutho kuzehlakalo athe ahlangana lazo njengelizwe.
Uthi uhulumende weZimbabwe sewazijayeza ukuba uzakutholiswa usizo ngakho yena engakuboni ukuqakatheka kokuhlala elungiselele yikho engazihluphi ukuthatha amanyethelo nxa kuthe kwaba lenkinga efana lalengozi yempophoma zamanzi.
Osebenza kuhlangothi lokukhankasela inhlelo zalenhlanganiso ye Rd Cross kanye lokukhulumisana lozulu enhlanganisweni ye Red Cross kuleli, umnumzana Takemore Maziruse baphakathi kokwenza inhlolisiso ukuze bazi ukuba uyisima kanjani umonakalo osuthe waba khona okwamanje ukuze bazi ukuthi kuyini okudingakalayo.
Uthi u Maziruse, kunje ifika amakhulu ayisikhombisa imizi eswonakele engozini yempophoma zamanzi ezigabeni ezihlezi zibhekana laloludubo, ezibalisa iMashonaland West, Mashonaland Central, Manicaland, Midlands, eTsholotsho esigabeni se Matebeleland North kanye le Malipati esigabeni seMasvingo.
Abohlangothi olubona ngezokuphathisa ngesikhathi sengozi lwe Department of Civil Protection Unity, baveza ukuba yinkona bezakuba lolwazi olwaneleyo ngemva kwenhlolisiso abayenzayo ukuze bazi ukuba lukhulu okunganani lolo dubo.
Kusenjalo, kulandela ukuna kwalelizulu, abanye abalimi bathi lincedise kakhulu ukukhulisa izilimo zabo lanxa kungasangeneki emasimini ngokhula.
UMnu. Keeper Ngwenya, isakhamuzi se Daluka eLupane, ongumlimi, utshele uSithandekile Mhlanga weStudio 7 ukuthi inengi labantu selilwisana lokhula emasimini njengoba ilanga selihlaba.
Your browser doesn’t support HTML5
Ingxoxo LoMnu. Keeper Ngwenya