Iqembu le Highlanders libe lomhlangano walo owenziwa minyaka yonke ngeNsonto lapho isinqumo sokuba owake waba ngumgcinisihlalo weqembu leli uErnerst Maphepha Sibanda engavunyelwa ukuphatheka kukhetho oluzakuba khona ekuqaleni kwenyanga kaNhlolanja samukelwe ngabalandeli loba nje kuke kwaba lokuphikisana okukhulu.
Umhlangano weqembu le Highlanders ungenwe ngabantu abafika phose amakhulu amathathu abagoqela labo abangamalunga apheleleyo ngoba bebhadele imfanelo edingakalayo, inkokheli yeqembu kanye lentatheli zindaba.
Indaba ebezisegudwini ngezihlanganisa eyokumiswa kuka Ernerst Maphepha Sibanda ukungena kukhetho lokudinga umgcinisihlalo omutsha ekuqaleni kwenyanga ezayo, ukungemukeli kweqembu le Highlanders ibhasi elivela kunkampani ye Nyaradzo kanye lesimo sesikhwama seqembu sona esingamanga kuhle.
Kuthe ngemva kokuba abalandeli becele ingcazelo phezu kokuba kungani okaSibanda evalelwe phandle okhulumela iqula elibona ngokhetho kuqembu le Highlanders uLuke Mnkandla wachaza ukuba lesisinqumo senziwe ngoba kuqakathekile ukuvikela isimo seqembu.
Phezu kwebhasi leNyaradzo umgcinisihlalo weqembu uPeter Dube uchaze ukuba ukungemukeli kwabo lelibhasi kusuka ekwesabeleni ukuba bengaphoxa inhlanganiso ye BancABC yona eyiyo ebapha usekelo lwemali.
UDube uqhubekele phambili wachaza ukuba ibhasi okwathiwa leliqembu lizancediswa ngu Retired Colonel Tshinga Dube ukulithenga selithengiwe okuyinto uTshinga laye ayitshele umhlangano ngesikhathi esephiwe ithuba.
Esesethula umbiko wakhe phezu kwesimo sesikhwama seqembu umphathingcebo uJerry Sibanda uthe isikwelede seqembu le Highlanders sesikhule safika ku $651 901 ngemva kokulahlekelwa yimali engange $65 657 ngo 2014.
Ebuzwa ukuba yiphi imizamo esiyenziwe liqembu eyokuqeda isikwelede lesi umphathingcebo uSibanda uthe lokhu kungenzeka nxa abalandeli bengaphathisa iqembu ngokufaka imali zabo kuthi labadlali kanye labaqeqetshi abakweledwa liqembu balixolele bathi lingasabhadali kumbe libhadale ingxenye njengalokhu okwenziwe ngu Mkhuphali Masuku.
NgeNsonto ezayo ke uPeter Dube uzabuyela esikhundleni sokuba ngumgcinisihlalo kuthi uNjabulo Bango, uPilate Mahlangu, uInnocent Batsani Ncube, uDonald Ndebele kanye lo Emmett Ndlovu bazancintisana bebanga isikhundla sokuba ngunobhala jikelele ikanti u Faith Silandulo Dube, uWisdom Mabhena, uCharles Moyo kanye lo Cleopas Ngano bazalwela isikhundla selunga lekhomithi.
.....................................
Sikhangele imidlalo yenguqu edlalwe kwamanye amazwe;
Emidlalweni eyokudinga intshantshu zezwekazi lase Africa amaqembu amela amazwe athi ele Congo Brazzaville lele Equatorial Guinea asefinyelele kusigaba se quarter – final yalumncintiswano ngemva kwemidlalo edlalwe ngeNsonto.
Okumangalisa ngalimpumela yikuba womabili lawa maqembu anqobe kusibaya sika Group A ayengaphumelelanga ukuyadlala kuma finals alumncintiswano asengena ngemva kokuba ele Morocco seliyale ukuqoqa limidlalo lelithuba laseliphiwa iEquatorial Guinea kwathi ele Congo lingene ngemva kokuba sekutholakale ukuba iqembu elimela ilizwe le Rwanda elalithole lelithuba lalisebenzise umdlali olamaphepha angaqondanga emidlalweni yalo.
Imidlalo iqhubekela phambili namhla kusibaya sika Group B njalo imidlalo egoqela amazwe athi ele Cape Verdelona elidlala lele Zambia kuthi ele Democratic Republic of Congo lizadibana lele Tunisia njalo yonke imidlalo yokucina eyezibaya isidlalwa ngesikhathi esifanayo.