Amalunga ekhomishini ekhangelane lokwamukela izikhalazo zabantu abayabe behlukuluzwe ngabezomvikela abagoqela amapholisa lamabutho, eyeZimbabwe Independent Complaints Commission, afungiswe ukuqala umsebenzi nguMongameli Emmerson Mnangagwa ngoLwesine abanye besithi ababoni ikhomishini le iqhuba umsebenzi ngemfanelo.
Bathi insolo yabo iphezu komgcinisihlalo walikhomishini uMnu Webster Chinamora, owayengumahluleli weHigh Court owatshiya isikundla lesi ngemva kokwetheswa icala lenkohlakalo.
Basola njalo uMnu Oliver Mandipaka olilunga leZanu PF njalo owake waba ngusikomitshi wamapholisa.
Kodwa isikhulumeli sikahulumende uMnu Nick Mangwana uthi abasola ukubakhona kwababili laba kulikhomishini balahlekile.
Amanye amalunga ekomishini le nguMnu Andrew Mataruse ongudokotela loNkosikazi Elizabeth Rutsate oligqwetha.
Ingcwethi ecubungula ezombusazwe uMnu Effie Dlela Ncube utshele iStudio 7 ukuthi kubalulekile ukuthi uMandipaka loChinamora baqhube umsebenzi ngendlela esuthisayo kungelani lezikhundla abaka baba kuzo.
Your browser doesn’t support HTML5
Ingxoxo loMnu Effie Dlela Ncube