Abasakhulayo koBulawayo bamukele ukugcotshwa kwabasekeli bakamongameli ngendlela ezehlukeneyo, abanye besithi abasekeli baka Mongameli Emmerson Mnangagwa bazakwenza isimo sezomnotho siguquke njalo bathole imisebenzi.
Kodwa abanye bathi akula nguquko ezabakhona eZimbabwe.
Omunye wabasakhulayo abaxoxe lomsakazo weStudio 7 nguNkosikazi Sichasisile Ndlovu othe ulokudana kakhulu ngokugcotshwa kwabasekeli bakamongameli ngoba kutshengisela ukuthi abesifazana kabanikwanga izikhundla eziphezulu nguMongameli Emmerson Mnangagwa.
Uthe kuyadanisa ukuthi abasekeli baka Mnangagwa ngabantu abakhanya bengelazwelo njalo abangahloniphi ilungelo likazulu.
Evumelana loNdlovu, osakhulayo uNkosikazi Martha Mathema uthe ukugcotshwa kwabo kutshengisa ukuthi uMnangagwa kathandi ukusebenza labasakhulayo kanye labesifazana.
Uthe sokusobala ukuthi ilizwe leZimbabwe lisibuswa ngamasotsha.
Omunye osakhulayo, uNkosikazi Sabelo Dube, uthe ukugcotshwa kwabasekeli BAKA Mnangagwa akusoze kuguqule lutho empilweni zabo kodwa bakhangele ngamehlo abomvu ukuthi mhlawumbe bazathola imisebenzi ngesikhathi esifitshane esilandelayo.
UMnumzana Nkosikhona Ncube uvumelane loMathema loNdlovu esithi abasekeli laba ngabantu asebekhulile njalo umcimbi wokugcotshwa kwabo yisenzo sokugcwalisa isisekelo sombuso njalo abasoze balethe inguquko ngoba sebehluleka labanye babo ukubusa ilizwe leZimbabwe.
Omunye njalo osakhulayo, uNkosikazi Rebecca Nyoni uthe uyajabula ngokugcotshwa kwabasekeli laba ethi besekuthethe isikhathi eside ukuthi kube labakhokheli abazalungisisa ilizwe leZimbabwe abasakhulayo bathole imisebenzi.
URetired General Constantino Guveya Chiwenga loMnu. Kembo Mohadi bakhethwe nguMnangagwa, owancediswa libutho leZimbabwe, ngeviki ephelileyo kulandela ukususwa kowayengumongameli, uMnu. Robert Mugabe.