Abenhlanganiso yabongi eye Zimbabwe Nurses’ Association (ZINA) bathi uhulumende useguqule isinqumo sokubaxotsha umsebenzi.
Unobhala jikelele wenhlanganiso le, uMnu. Edwin Nhema, uthi kukhanya engani umsekeli kamongameli uRetired General Constantine Chiwenga wayengatshelwanga iqiniso ngesimo sokusebenza kwabo.
Isikhulumeli se Centre for Community Development Initiatives in Zimbabwe, uMnu. Leopold Munhende, uthe kuhle kakhulu ukuzwa lokhu nxa kuliqiniso ukuthi uhulumende usecabange ukubuyisela abongi emsebenzini.
Abongi bathi uhulumende kabaphathi ngemfanelo.
UChiwenga ubexotshe abongi bonke abaqatshwe nguhulumende elizweni lonke abangaba zinkulugnwane ezilitshumi lasithupha - 16,000 - esithi ukukhalala kwabo umsebenzi akulani lezikhalazo zabo kodwa beveza ukungahloniphi umbuso webandla leZANU PF.
Kusenjalo, abongi bakoBulawayo abasabuyanga eLarge City Hall lapho abakade bethembise ukuthi bazabuthana khona basize abantu kwezempilakahle ngaphandle kwembadalo.
Abantu abalixetshana bebebonakala behlezi eCity Hall belinde abongi.
Your browser doesn’t support HTML5
Udaba Esilethulelwe NguGibson Bhebhe
Abenhlanganiso elwela amalungelo abongi eye ZNA bethule umbiko othi kusakhulunyisanwa lohulumende ngodaba lokuxotshwa kwamalunga ayo umsebenzi.
Abantu balobela uhulumende incwadi bemcela ukuthi alungisa udaba lwabongi.
Uhulumende ubikwa evuma ukuthi uphosisile ngokuxotsha abongi umsebenzi njalo nxa bengehluleka ukuvumelana bazakhweza udaba lwabo emthethwandaba.
Omunye wabakade beseCity Hall, uNkosikazi Mable Sibanda, uthi ubesejabule esizwa ngelokwelatshwa kwabantu kungela nhlawulo ngoba engatholanga usizo esibhedlela.
Isibhedlela seMpilo sibikwa besesiqalisile ukuqhatsha abongi.
UDokotela Solwayo Ngwenya uthe baqhatsha abongi abangasebenziyo labatshiya umsebenzi.
UNgwenya wengeze esithi uhulumende uthi abongi abaxotshiwe umsebenzi bazadinga ukuqatshwa kutsha njalo isibhedlela seMpilo asilahlekelwanga ngumpefumulo ngenxa yokukhalala umsebenzi kwabongi.
Your browser doesn’t support HTML5
Udaba Esilethulelwe NguBathabile Masuku