UMnu. Constantino Chiwenga, umsekeli kamongameli njalo ophethe uhlangothi lwezempilakahle, ubengowokuqala eZimbabwe ukuhlatshwa ijekiseni yeSinopharm COVID-19.
Abongi bahlabe uChiwenga ijekiseni le eWilkins Hospital eHarare ngesikhathi kusungilwa uhlelo lokuhlaba abantu elizweni.
EleChina lanika eleZimbabwe amajekiseni azinkulungwane ezingamakhulu amabili – 200,000.
Abantu abanengi eZimbabwe kade befuna ukuba inkokheli yelizwe ihlatshwe kuqala bengakahlatshwa bona ijekiseni le elokhu ihlolisiswa yinkampani yakwele China.
Ayikanikwa imvumo okupheleleyo yinhlanganiso ebona ngezempilakahle emhlabeni wonke jikelele eyeWorld Health Organization.
Kukhangelelwe ukuthi abongi, odokotela, abantu abagula imikhuhlane etshiyeneyo lababalisi bazakuba ngabokuqala ukuhlatshwa.
EleZimbabwe lithi lizathenga amajekiseni amanengi kwele China kumaviki ambalwa alandelayo.