UBulawayo uveze ukukhathazeka okukhulu kulandela ukuhlukuluzwa ngabezomvikela lamhlanje bebavimba ukungena enzikini yedolobho, abanye bebulawelwa amafasiteli ezimota kanye lokutshaywa kwabantu mahlayana kungela obachasiselayo ukuba lokhu kwenziwa ngasizatho bani.
Uzulu wakoBulawayo uvuke evinjwa ukuba angene enzikini yedolobho, wonke umuntu obeqonde khona ubesehliswa emabhasini ekhamaniswa ukuba abuyele emakhaya akulamuntu obevunyelwa ukuya loba emsebenzini.
Abezombusazwe, uzulu kunye labalwela amalungelo oluntu baveze ukukhathazeka ngenyathelo likahulumende lokuhlukuluzwa kwabantu.
Olwela amalungelo oluntu, uMnu Effie Ncube usole kakhulu inyathela likahulumende.
“Icorona virus ayivikelwa ngokuhlukuluza abantu, lokhu esikubone lamhlanje amapholisa lamaotsha evimba abantu ukungena edolobheni asikwamukeli yisigukurahundi . UHulumende wephula amalungelo oluntu kumele ephilisane kuhle labantu hatshi esikubone lamhlanje.”
Osakhulayo wakoBulawayo, uNdodana Moyo ngomunye wabasole isehlakalo sanamhlanje.
''lsehlakalo esisibone lamuhla ezweni sibi kakhulu siveza ukwehluleka kukahulumende ekuvikeleni abahlali belizwe njalo lokhu kungaba yingozi sekuseduze ukuthi abantu babuyisele, Yisenzo esibi siyasisola pho sasiwukhuphelani umbuso wamabhunu sihlukuluzwa ezweni esalikhulula kudala.”
Olwela amalungelo oluntu uMnu Mbuso Fuzwayo umabhalane weIbhetshu likaZulu usole ulaka okuvezwe ngabezomvikela namhlanje koBulawayo.
“Kulusizi ukuba amapholisa ahlukuluza abantu ngoba abatholanga iholo ngendlela abakade beyikhangelele. Abezomvikela yibo abavikela umbuso okhona kodwa bahlukuluza uzulu ongelacala, bayamazi uhulumende obusayo ukuba nguye obaphilisa nzima abayeke ukuhlukuluza abantu.”
lsikhulumi sebandla leMDC-T, uMnu Khaliphani Pugen uthi baphatheke kabi ngokuhlukuluzwa kwabantu ngabezomvikela.
“Sizwa njengebandla siphatheke kabi ngokwenzakala koBulawayo. Asikwazi ukuthi ezweni kuvuke sekuthiwa abantu bayahlukuluzwa, betshaywa sekuvaliwe abasengeni edolobheni kunye lemibiko yokuthi izimota zilimele. Uma idale lephalamende lihlala kusasa kusiba lethuba lemibuzo sizathi amalunga edlale abuze ukuthi kwenzakalani kungani abantu sebevuke behlukuluzwa kangaka.”
UMnu Khaliphani Pugen uqhubekele phambili ecela uzulu ukuba angaphatheki emisebenzini emibi ezenza isenzo samapholisa sibe yize.
“Sicela ukuba abantu bakithi bengenzi lutho okuzanika ithuba abezomvikela ukuba batshaywe kumbe babulawelwe izimota zabo.”
Isikhulumi sabakubutho, Lieutenant-Colonel Alphios Makotore uthe ebuzwa ngesenzo samasotsha lamhlanje ezweni wathi yena ukukhefu kazilutho inombolo zalabo athe bamele bakhulume incingo zabo bezingemukelwa muntu saze saya emoyeni.
Isikhulumeli samapholisa, uAssistant Commissioner Paul Nyathi laye walile ukukhuluma ngalesi sehlakalo esithi usatshayela uzakhuluma nxa esephume emhlanganweni lapho aya khona. Kodwa size saya emoyeni lokhu engakaphenduli.
Your browser doesn’t support HTML5
Udaba Esilethulwe NguAnnahstacia Ndlovu Oluphathelane Labemvikeza Abahlaselwe UBulawayo