Amabandla ezombusazwe atshiyeneyo ngoMvulo akhuthaze intathelizindaba ukuthi zibhale indaba eziphathelane lokhetho kanye lezombusazwe ngobuqotho zingeyamelanga kuhlangothi oluthize.
Inkuthazo le iphume emhlanganweni oqoqwe yinhlanganiso yeVoluntary Media Council of Zimbabwe (VMCZ) owenzelwe edolobheni lakoBulawayo.
Abakhulume emhlanganweni lo bagoqela usikomitshi weZimbabwe Electoral Commission, uMnu Qhubani Moyo, umsekeli kaMongameli wePDP uMnu Kucaca Phulu lelunga lephalamende eleZanu PF uMnu Joseph Tshuma.
“Isicela sami ngesokuthi intathelizindaba zisebenze ngobunono zizimele ngoba into ezingayikhuluma ingafaka ukuthula kumbe ubudlwangudlwangu elizweni,” kutsho uMnu Tshuma.
“Lingavumeli ukuthengwa ngabantu ngoba thina abepolitiki singabantu ababi abathenga intathelizindaba. Nxa ubona into ofuna ukuyenziswa imbi kumele wale.”
UMnu Phulu yena ukhuthaze intathelizindaba ukuthi zingaze zavuma ukusetshenziswa yiZanu PF.
Your browser doesn’t support HTML5
Udaba Siluphiwa nguBathabile Masuku
“Siyakunanzelela njalo ukuthi imedia ilokhe isetshenziswa yiZanu PF njalo sibakhuthaza ukuthi banikeze amabandla ezombusazwe ehlukeneyo ngokufanayo,” kutsho uPhulu.
Intathelizindaba esebenzela koBulawayo uMnu Henry Ndlovu uthe umumo welizwe ubangela ukuthi basetshenziswe njalo bacine bevuma ukufumbathiswa.
“Laloba imithetho elawula ukuthi intathelizindaba zisebenze njani siyazi kodwa indlala ephandle lapha icina isenza samukele imfmbathiso ngoba kulemali kakhulu,”