Umkhankaso wabeZimbabwe National Family Planning Council abawuqhuba besebenzelana labenhlanganiso eye Plan International, behambela abantu emizini ehlala abanengi, koBulawayo, bathi ujonge ukukhuthaza abasakhulayo ukuba basebenzise indlela eziqondileyo ezokuzivikela emikhuhlaneni yengulamakwa njalo lwenziwa ngaphandle kwembadalo.
Umnumzana Mission Gwafa isikhulumeli seZimbabwe National Family Planning Council uchasisa kabanzi ngohlelo lwabo lolu abaluqhubayo ngale iviki lokuthi kungani bekhethe ukusebenza labaleminyaka ephansi kwengamatshumi amabili lane-24.
“Uhlelo esingalo siluthatha ema clinic ethu siluse ebantwini ngoba abantu balenhlupho abahlangangana lazo ukuze basifinyelele. Akuhambeki ngenxa yomkhuhlane lo okhona ubhubhane lweCorona kube kanti lendleko ze transport zithwalisa nzima abantu. Uhlelo lolu luqondane labasakhulayo abeminyaka 10 kusiya ku 24years. Sikhangelane labantwana laba uzathola ukubana balenhlupho ezinengi ezinjengemikhuhlane yemacansini, ukuzithwala bengalungiselelanga bacine bekhipha izisu kucine kuphazamisa ihealth yabo.”
Egcizelela umnumzana Gwafa uthe isikhathi esinengi udaba lwemacansini alukhulunywa ngalo emakhaya luyazila kukanti lokhu akumisi abasakhulayo ukuya lapho.
“Indaba yamacansi ayikhulunywa ezindlini ayikhulunywa emabandleni ayikhulunywa esigabeni iyazila kube kanti kuzila kunjalo akumisi abantwana ukuba baye emacansini. Siyakwazi sonke, siyakubona ngamehlo abantwana bayazithwala. Ilockdown yonale yenze abanengi behluleka ukuzofinyelela indlela zokuzivikela abanengi bazithwale bengazimiselanga, ayisibo bantwana bodwa ngitsho kanye labadala.”
Umnunzana Ephram Ndlovu oyisakhamuzi seMagwegwe uthi wenelisile ukuba ahlole igcikwane le HIV endawonye lonkosikazi wakhe.
“Bengihlala ngile stress sokuthi engxenye ngilomkhuhlane kodwa lamuhla sengihloliwe ngikhululeke kakhulu ngoba lomama engilaye ubetshona esithi engxenye ngilawo ngoba singakaze sihlolwe ndawonye kodwa lamuhla ngenxa yokuthi bakhonapha eduze lathi sihle sahlolwa ndawonye so ngiyathaba kakhulu.”
Unkosazana Bhebhe ukhuluma ngakufundileyo kulumkhankaso wabe Zimbabwe National Family Planning Council.
“Mina ngifunde ngokuzivikela kanye loku tester. Kuthiwa umuntu kumele ahlale ekwazi i status sakhe. Mina ngekhaya indaba zemacansini bayangifundisa lokunye okunengi sikufunda esokolo, kodwa lamuhla ngifundile ngokuba ngilinde njalo uhayi wami abe nguhayi nxa ngikhuluma lejaha.”
Uhlelo lwabeZimbabwe National Family Planning Council oluqale ngoMvulo, mhlaka 14 Mpandula lugqhitshwa ngeviki ezayo. Abe ZNFPC bathi kusasa bazabe besemzini weCowdrypark eMpompini, ngoLwesine bazabe bese Cowdrypark njalo eTerminus kuthi ngoLweSihlanu bazabe beseMpopoma koBango kuthi ngeviki ezayo ngoMvulo bazabe beseMinyela Grounds, ngoLweSibili begqiba uhlelo besemaphandleni aweSt Peters kanye leKhami.
Your browser doesn’t support HTML5
Udaba lohlelo lwabasakhulayo ngabeZNFPC koBulawayo siluphiwa nguBathabile Masuku