Inhlanganiso yabaphila ngokuthengisa ezithaladini eye Zimbabwe Informal Sector Organization-Ziso isilungiselela ukuhambisa umka mongameli uNkosikazi Grace Mugabe emthethwandaba ngokuthathela amalunga impahla yabo esiyayinikeza kubalandeli bebandla lakhe leZanu PF.
Umqondisi wenhlanganiso ye ZISO umnumzana Promise Mkhwananzi uthi sebehambise loludaba kumagqwetha ukuba luthathelwe amanyathelo ngokuphangisa ngoba okwenziwa ngumka mongameli kwephula ilungelo loluntu. Uthi umkamongameli wazikhulumela ngokwakhe esethekelela eBhinga phambi komhlangano lezakhamizi kulindawo ukuba unikeza impahla ehlanganisela eyathathelwa abathengisela emigwaqweni.
Umnumzana Masimba Kuchera ocubungula ngezombusazwe uthi akaboni kusiba lula ukuba lokhu kuphumelele. Uthi amapholisa yiwo alomlandu wokulondoloza umthetho ebopha abawephulayo ethi kukhanya kungaba nzima ukuveza ubufakazi bokuba uNkosikazi Mugabe wabathuma ukuba benze konke lokhu. Uthi kanjalo kukhanya leli nyathelo lokumbophisa kuyikudinga ukutshengisa ukukhonona kwabo kuphela labo bazwakale:
Inhlanganiso ye ZISO yanikeza isikhalazo sayo kumagqwetha eKadzere Hungwe and Mandevere ukuba ekhweze loludaba emithethwandaba besebenzelana labe Zimbabwe Lawyers for Human Rights okuyikho okwenzakalayo okwamanje.
Abaphila ngokuthengisa edolobheni le Harare bahlala begijinyiswa bexotshwa phakathi kwalelidolobho bekhuthaza ukuyasebenzela endaweni ezikhethiweyo kodwa bona besala besithi lezindawo zikhatshana lalapho okutholakala abathengayo.
Your browser doesn’t support HTML5
Abaphila ngokuthengisa basa uNkosikazi Grace Mugabe emithethwandaba