Izizalwane zeZimbabwe ezihlala kwele South Africa zitshengisele emahofisini ommeli weZimbabwe ePretoria ngempelaviki zisithi umongameli Robert Mugabe sekumele ehle esihlalweni. Ukutshengisela lokhu kuqhutshwe ngelanga lokufikisa kukamongameli iminyaka engamatshumi ayisitshiyagalolunye lanye-91, ezelwe.
Idili lokuthakazalela leli langa elenziwa ngoMgqibelo licatshangelwa ukuthi lizaba lendleko engaba yisigidi samadola-$1million.
Abatshengiseleyo ngempelasonto hatshi kwele South Africa kuphela kodwa laseMelika, eBhilithani lakwamanye amazwe, bethesa umongameli Mugabe umlandu wokubhidliza umnotho welizwe besithi njalo useluphele kakhulu okokuthi akasenelisi ukukhokhela ilizwe.
Izizalwane zeZimbabwe bezisukume ngobunengi kuhlangene ebezombusazwe labenhlanganiso zikazulu bonke bememeza ngelithi sekuyisikhathi sokuthi umongameli Mugabe ehle esihlalweni.
Lobanje abebebuthene laba bengavumelani ukuthi ngubani okufuze athathe intambo zombuso nxa uMugabe esehlile esihlalweni, kunkuthazo yokuthi atshiye phansi intambo zombuso bazwilinye.
Umnumnzana Giyane Dube owebandla leMDC ekhokhelwa ngumnumnzana Morgan Tsvangirai ngomunye wabatshengisele besithi umongameli Mugabe akehle esihlalweni.
Abebandla le Zapu labo bebephume ngobunengi . Ilunga laleli bandla umnumnzana Andrew Nyathi utshele iStudio 7 ukuthi uMugabe leZanu pf sebehlulekile ukubusa ngakho kakumelanga baphinde bephiwe elinye ithuba lokubhidliza ilizwe.
Inhlanganiso zikazulu lazo beziyingxenye yalokhu kutshengisela. Umgcinisihlalo we Global Zimbabwe Forum umnumzana Solomon Chikowero, utshele iStudio 7 ukuthi okweminyaka yonke abuse ngayo, umongameli Mugabe ubhidlize impilo yezigidi zezizalwane zeZimbabwe eseziyinhlekisa emazweni eziphephela kuwo.
Nomanje, kungelamuntu ophumileyo ehofisini yommeli we Zimbabwe ukuzwa izikhalazo zabakade betshengisela laba, bona bakubeke kwacaca ukuthi bazaphenduka futhi nxa umlayezo wabo ungafikiswanga kumongameli.
Kusenjalo, umgcinisihlalo wabatsha kubandla leZANU PF esigabeni seMatabeleland North, uMnu. Tamuka Nyoni utshele uSithandekile Mhlanga weStudio 7 ukuthi ibandla lakhe lifolile edolobheni leVictoria Falls ngempelaviki linanza ilanga lokuzalwa kukamongameli Mugabe njalo alizikhathazi ngokutshengisela okwenziwe yizizalwane zeZimbabwe ezihlala kwamanye amazwe ngoba zingazwisisi okwenzakala elizweni kanye lokusebenza kwesisekelo sombuso webandla leZANU PF.
Your browser doesn’t support HTML5
Ingxoxo LoMnu. Tamuka Nyoni