Abantu eZimbabwe bakhala labeMelika kulandela ukubhubha kowayengumongameli uJimmy Carter.
Abakhulume lomsakazo weStudio 7 bathi uCarter wasebenza kakhulu ukuveza okwakusenzakala kwezokhetho eZimbabwe lakwamanye amazwe. Izithunywa zeCarter Center ezahlolisisa ukhetho eZimbabwe olwaqhutshwa nyakenye zathi ukhetho kaluqhutshwanga kahle.
Inhlanganiso le yathi kumele kulungiswe indlela okuqhutshwa ngayo ukhetho eZimbabwe, okugoqela imithetho, ukwenza kube lokukhululeka ngesikhathi sokhetho, kunikwe bonke abancintisa kukhetho amathuba okukhuluma lozulu emisakazweni kazulu lokunye.
Abalandela lokhu bancoma konke lokhu okwethulwa yiCarter Center. Omunye wabo nguMnu. Effie Dlela Ncube, ingcwethi kwezombusazwe ezimeleyo.
Omunye wabo nguMnu. Effie Dlela Ncube, ingcwethi kwezombusazwe ezimeleyo.
“Lanxa ubesekhulile selemnyaka elikhulu ukwedlula kowayengumongameli weMelika uJimmy Carter kuyinto ebuhlungu kakhulu ngokuba wasebenzisa isihlalo sakhe sokuba ngumongameli emnyakeni yabo 70s ukuncedisa ukuletha ukuthula waze waletha ukuthula phakathi kweleIsrael leleGibhithe wasebenzela amalungelo abantu wenza ukuthi umbuso waseMelika ukhangeleke kakhulu, lamalungelo abantu emhlabeni hayi ezenotho kuphela.”
Uyaphambili uNcube ekhuluma ngemsebenzi kaCarter esephumile esihlalweni sikamongameli.
“Lanxa esephumile esihlalweni ngokuba wahlala iterm eyodwa nje wasebenzisa inhlanganiso yakhe ebizwa kuthiwa yiCarter Center ukugijima umhlaba wonke jikelele ekhuthaza ukuthi kube lokhetho olukhululekileyo kuhlonitshwe amalungelo abantu kube lokuthula emhlabeni wacina ethola iNoble Peace Prize ngo2002 ngenxa yomsebenzi wakhe emalungelweni abantu lokuthula lokhetho olukhulekileyo. Ngakho-ke ungumuntu owaziwa ngabantu abanengi abathanda ezokuthula lamalungelo abantu abazamswela kakhulu.”
UCarter wathuma iqula lakhe leziphathamandla zikahulumende kweleBhilithane ukuyakhulumisana lababelwela inkululeko kanye lababekuhulumende kaIan Douglas Smith owayebusa eRhodesia. UMnu Greater Sibanda ingcwethu kwezombusazwe ezimeleyo uthi uCarter wancedisa ukuthi eleZimbabwe lithole uzibuse.
“Isese yiRhodesia nguyena ongomunye wabantu owenze ukuthi khona iZimbabwe ize ithole uzibuse. Ubaba uCarter ngumuntu esimhlonipha kakhulu ngalokho simbonile futhi njengomuntu omdala ukuthi ungenile futhi wabakhona ukuthi apromothe ipeace kuAfrica yonke apromothe ipeace kumhlaba wonke jikelele.”
Ilunga lebandla leZapu uMnu. Mathew Sibanda uthi uncoma imsebenzi emihle kaCarter.
“UJimmy Carter wase America yindoda eyayiyindoda emadodeni eyayisazi ukubana ihlanganise abantu ukubana umhlaba wonke abantu bangaxabani, bazwisisane njengabantu basemhlabeni bengahlali besilwa begolombana kuhlala kuyizimpi ingakho ngaleyondlethwa sikhala sonkeni lemuli yakhe labase America ukubana hayi indoda isitshiyile uhambile indoda ndodayemadodeni.”
Sixoxe njalo loMnu. Joseph Tshuma webandla leZanu PF othi uCarter wayeyindoda ekhaliphileyo.
“Sayazi bevele beyincoma beyibiza yona uSunday school teacher umbalisi wezenkolo wakuthatha khonokhwana wakufaka ekubuseni kwakhe i America iPresidency yakhe ibigcwele inkulumo zokuthula inkulumo zokwakha inkulumo zobudlelana okuyinto eyayenza kwacina ethola ke isiqeqetsho seNoble price ye peace sesibonile abanye ababuyileyo abnye baze baphiwa amabizo thwa ngama WarMongers abavele bethanda ubudlwangudlwangu bethanda ukwenza lokhyana esithi ngesikhiwa yi Bullying asange sikubone kubaba uJimmy Carter.”
ICarter Center iqhubekela phambili ihlolisisa ukhetho emazweni atshiyeneyo njalo lokulwisana lemikhuhlane efana leGuinea Worm.