Idale lephalamende kwele Botswana selivumile ukuthi umuntu abalelungelo lokuba yisizalwane samazwe amabili - idual citizenship - osekwamukelwe ngabe Zimbabwe abalabantwana lezizalwane zeBotswana. Umphathintambo obona ngendaba zaphakathi kwele Botswana, uNkosazana Annah Mokgethi, nguye owethule umthetho we-dual citizenship ukuthi uhlaziywe ngamalunga edale lephalamende.
“Siletha lomthetho ngoba kumele abantwana abazalwa yisizalwane seBotswana lomuntu wakwelinye ilizwe, kumele bakthethe uma befuna idual citizenship uma befisa.”
Isinqumo sokufaka idual citizenship sitsho ukuthi akuselasidingo sokuthi uma oweZimbabwe efuna amaphepha awokuba ngowakwele Botswana, ahlanekele ukuba ngowe Zimbabwe. Abalabazali abadabuka emazweni amabili atshiyeneyo akuselasidingo sokuthi bakhethe ilizwe elilodwa uma besenelisa iminyaka engamatshumi amabili lanye (21).
Ommela isigaba seFrancistown edale lephalamende uMnunzana Wynter Mmolotsi uthi banengi abeZimbabwe abaphazanyiswa ngumthetho owalela ukuthi umuntu abeyisizalwane samazwe amabili.
“Silabo abakithi abalabantwana labe Zimbabwe. Kodwa abantwana laba bazithola sebehlupheka bengakwazi ukuthi kahle kahle kibo kungaphi ngenxa yomthetho esilawo.”
OweZimbabwe olezingane ezazalwelwa kwele Botswana, uNkosazana Sindiso Sibanda, uyamukela inyathela lephalamende phezu kwe dual citizenship.
“Ukuthi uzulu abelelungelo lokuhlala nxa zonke lokhu sikubona kuyinto enhle ngoba abantwana balakho ukuzikhethela ukuthi bafuna ukuhlala kuphi noma ngasiphi isikhathi.”
UMnunzana Cosmas Sibanda odabuka eZimbabwe uthi zindaba ezinhle ukuthi kube lomthetho ovumela ukuthi umuntu abeyisizalwane samazwe amabili.
“Lokhu kuzakwenza ukuthi bahlale bazinze ikakhulu sikhangele ikusasa ukuthi lawe usungaba lezamabhizimusi ukhululekile kulelilizwe.”
Ommela iZimbabwe kwele Botswana, uMnunzana Henry Mukonoweshuro, ubonga okwenziwe ngele Botswana esithi kungenelana lokwenziwa yiZimbabwe ngaphansi kwesisekelo sombuso esalotshwa ngomnyaka 2013.
“Lokhu kutsho ukuthi abalabantwana abazalwa lapha abasoke bathwale nzima ngokugijima bezama ukuntshintsha amaphepha, ngitsho labazali abafuna ukuba ngabalapha sekuzakuba lula kibo.”
EleZimbabwe lalo liyavumela ukuthi umuntu abe le-dual citizenship. Lokhu kumunyethwe kusisekelo sombuso esalotshwa ngo2013. Ngenxa yokungahlaliseki kwesimo somnotho eZimbabwe, inengi eliphuma phandle kwelizwe licina liyakhe imizi, njalo lithatha amaphepha awokuba yizizalwane zamazwe afana leBotswana, South Africa, Bhilithane, Melika lamanye.
SEE ALSO:
Udaba Esilwethulelwe NguMqondisi Dube