Izizalwane zeZimbabwe ezisemazweni sezikhuthazwe ukuthi ziqale ukuphatheka kwezomnotho lezombusazwe elizweni lazo lomdabu ukuze zibe lesandla ekulawuleni lapho okuya khona ikusasa yelizwe.
Umqondisi wenhlanganiso ye Refugees Studies Centre e University ye Oxford, umnumnzana Alexandra Betts, utshele Istudio 7 emhlanganweni obuqoqwe yi Global Zimbabwe Forum eJohannesburg ukuthi ukubaleka elizweni umuntu afulathele kakusoke kulungise inhlupho ezibhekane lelizwe.
UBetts uthi sekuyisikhathi sokuthi izigidi zezizalwane zeZimbabwe ezabaleka elizweni okweminyaka zikhangele emuva ziqale ukwakha ikusasa yelizwe elilempumelelo.
UBetts uthi ulwazi lobungcitshi osebutholwe yizizalwane zeZimbabwe emazweni ezihlala kuwo kuqakatheke kakhulu emacebeni adingakalayo ekuthuthukiseni umnotho lezombusazwe. Ukhuthaza abeZimbabwe laba ukuthi baqale ukuzibuza imibuzo ezikileyo ngekusasa yelizwe labo.
Umnumnzana Daniel Molokele yisizalwane seZimbabwe, kukanti uligqwetha lezamalungelo oluntu eselihlale kweleSouth Africa okweminyaka elitshumi lanye. Yenake uthi akathandabuzi ukuthi ikusasa yeZimbabwe yeyeme kakhulu kuzizalwane zeZimbabwe ezisemazweni.
UMolokele upha izizalwane zeZimbabwe ezisemazweni inqobe zokuqala ukuthatha amanyathelo okuphindela eZimbabwe besiyasungula amabhizimusi kanye lokungena ezikhundleni zombusazwe esithi ikusasa yelizwe isezandleni zabo.
Esinye isizalwane seZimbabwe umnumnzana Godfree Phiri, uthi kungamthokozisa kakhulu ukubona izizalwane zeZimbabwe emazweni ziphila njengenkosana elolongelwa ukuthatha intambo zombuso. Kodwake uthi kula malungiselelo imfundo kuzafuze kube yisikhali esilolwa kulazo zonke.
Kusenjalo inengi labeZimbabwe laba bathi bazimisele ukuyavuselela ilizwe labo kodwake bathi bathikaziswa yikungabi leqiniso lokuthi kambe inkokheli ezikhona elizweni khathesi zizabavumela na ukwenza lokho.