Abafundisi bamabandla akunhlanganiso yeZimbabwe Devine Destiny bathi baqoqa ukuyabonana lomsekeli kamongameli welizwe umnumzana Emmerson Mnangagwa, onguye njalo umphathintambo wezemithetho, phezu kokunyamalala kuka Itai Dzamara nyakenye, olokhe engakazakali ukuba usaphila loba hatshi lokuba ungaphi lezinye indaba ezihluphayo elizweni.
U-Bishop Ancelimo Magaya
Lokhu kwethulwe ngumkhokheli walinhlanganiso ye Zimbabwe Devine Destiny uBishop Ancelimo Magaya, eMedia Centre ngoMvulo emini, emhlanganweni lentathelizindaba, lapho inkokheli kulenhlanganiso ibisethula umbono wayo phezu kwesimo esiselizweni.
Bebekhona abanye abafundisi abangamalunga alenhlanganiso, okubalisa umfundisi Rogers Tekwa ogcizelele kulendaba yokuba bafuna ukubonana lomsekeli kamongameli Mnangagwa phezu kokunyamalala kuka Dzamara.
Ethi indaba ka Itai Dzamara iqakathekile kakhulu ukuba ibe ikhulunywa kokuphela, ingaze yakhohlakala ngoba kuyikho okuvele kudingwa nguhulumende ukuba iphele kanjalo.
Abe Zimbabwe Devine Destiny bathi kumqoka ukuba aqondwe uhulumende phezu kwesimo esingesihle elizweni, kuhlalwe phansi kukhulunywe lokuphana amacebo ukuba kuthiweni ukusilungisisa, kungakhangelwa ukuba ungowaliphi ibandla loba inhlanganiso.