Ele Zimbabwe lavuma ukwethula imithetho ekhuthaza ukuphatheka kwabesifazana kwezombusazwe kodwa ngomnyaka ophelileyo ka2017 omama babhekane lobunzima obukhulu ngoba izehlakalo zomnyaka bezisephula izithembiso ezimunyethwe ngumthetho lesisekelo sombuso.
Abesifazana abaphatheke kwezombusazwe bakhala ngokuthi, umnyaka ka 2017 ubatshengise sobala ukuthi ilizwe lisese khatshana kakhulu ekuphakamiseni omama ngoba laloba imithetho ikhona ayilandelwa njalo abakhokheli abala sifiso sokuyihlonipha.
UNkosazana Thabitha Khumalo oweMDC-T
UNkosikazi Thabitha Khumalo uthe kunengi okungazange kubajabulise lonyaka ngodaba lokuthi omama benelise ukungena ezikhundleni. Uthe kwabhalwa isisekelo sombuso esivumela omama ukuthi bangene ephalamende okwamahlandla amabili ngaphansi kwe “Proportional representation” kodwa lokhu sokudale ukuthi omama behluleke ukuxoxisana lozulu ngoba bengenelisi ukuyangena emphhakathini ukuyankankasa. Uthe okuyisiqalekiso esikhulu lidale labampathintambo ele khabhinethi kamongameli Emmerson Mnangangwa eyiyo evalele phandle omama ngokufaka abane kuphela.
UNkosazana Thabitha Khumalo ubhalisa igama lakhe kugwalo lokuvota.
Olwela amalungelo oluntu unkosikazi Sichasisile Ndlovu, uthe, umnyaka ka 2017 obungamuhle ngoba omama bebevalelwa ukuthi bathole izikhundla kwezombusazwe laloba bebezama ukuthi labo bathole amathuba. Uthi kulusizi kakhulu ukuthi lonkosikazi kowayengumongali welizwe uGrace Mugabe wasetshenziwa njengelele yilabo ababefuna ukuqansa kwezombusazwe.
Evumalana loNdlovu unkosikazi Abigail Mupambi uthe kumnyaka ka 2017 omama basetshenziswe kakhulu kodwa akulazikhundla ezicacayo abazitholileyo.
Ongumsekeli kamongameli weMthwakazi Republic Party unkosikazi Presia Ngulube uthe omama bancindezelwe kakhulu njalo basuka badelele emuva ngenxa yobandlululo.
Umnumzana Thomas Sithole uthe, uhlupho olukhulu lwabomama yikuthi ababambanaga njalo abananzeleli amandla abalawo. Uthe omama banengi kakhulu njalo yiwo amandla okufanele bawasebenzise ukuthi baxhasane ezikhundleni.
Umhlanano wabesifazana
Unkosikazi Monica Ncube owebandla leMDC ekhokhelwa ngumnumzana Welshman Ncube uthe omama bahlutshwe yikusweleka kwemali ukuthi benelise ukuqhuba umsebenzi bexoxisana labantu.
Unkosikazi Eshna Moyo oyisakhamuzi sakoBulawayo uthe omama bahlutshwe yikukhangelelwa phansi obekubenza behluleke ukuthi basebenze ngobuqotho. Uthe omama banengi kakhulu elizweni kodwa nxa sekufika kwezombusazwe bababalutshwana.
Omama abanengi beZimbabwe balokhe besalele emuva ikakhulu ekuphathekeni kwezombusazwe. Lonyaka omama behlisiwe kakhulu ezikhundleni njalo kwaba sobala ukuthi omama bayasetshenziswa kwezombusazwe ngoba inengi lisola uGrace Mugabe ngendima ayidlalayo kuloluhlangothi.
Your browser doesn’t support HTML5
Udaba lwabesifazana abaphatheke kwezombusazwe siluphiwa nguBathabile Masuku