Lonyaka koBulawayo njengazo zonke indawo zelizwe akubanga lombuthano wokunanza usuku lokuqakathekisa abakumsebenzi wezomvikela elizwe, eleDefense Forces Day, okongokwakuqala lokhe ilizwe latholayo uzibuse.
Lokhu kuvinjwe yikuqhamuka kwegcikwane leCovid-19, elimemetheka okwethusayo hatshi eZimbabwe kuphela kodwa lasemazweni womhlaba. Ngaphandle kokuvinjwa kwemikhosi yokunanza leli langa, uzulu ukhala ngokuhlukunyezwa ngabezomvikela ngalesi sikhathi seLockdown.
Abezomvikela lonyaka, bananze usuku lwabo phansi kwendikimba ethi “ZDF: Celebrating 40 years of Excellent Service to the People”. Kodwa bekungela micimbi yokufola lokubukisa izikhali zabakubutho njengeminyakeni yonke ngenxa yohlelo lweLock Down lokuvikela ukumemetheka kweCOVID-19 eZimbabwe. Ngasikhathi sinye uzulu usola ukusebenza kwabezomviekla ethi amalungelo oluntu ephulwa mahlayana ngabebutho.
Umnunzana Mkhokheli Ndlovu osakhulayo wakoBulawayo uthi ilanga leli alisela sisindo ngenxa yokuhlukunyezwa abahlangana lakho ngaphansi kwabebutho.
“Abantu okumele kubeyibo okumele ukuthi ngabe bayasidefender yibo esesibesaba kakhulu more than isitha esingasilimaza nxa sikhuluma ngedefence angiboni idefense esingakhuluma ngayo. Which defense esilayo thina ngoba idefense yakhona yiyo esihlukuluzayo esitshayayo ngibona nje kufanana konke mhlawumbe bonalabo eba protect.”
Umnunzana Dumile Ncube isakhamuzi sakoBulawayo uthi ilanga leli alisahlonipheki ngenxa yezizatho ezinengi.
“Lolu usuku lakhathesi esithi yidefense forces angiluboni ukuthi kuseyikho ngoba bahlala betshaya abantu okumele ukuthi ngabe bayasidefender akusincedisi ngalutho sokulusukunje olukhona ecalender. Isiqokoqela sendaba seyiso kulokho ngoba amabutho akhona okumele anakekele abantu asebhizi etshaya abantu ukuthi ngabe bayasidefender lusukunje. Kudala ye sasiluthakazelela usuku lwamabutho sisithi lwasilethela ukuthula elizweni.”
Unkosazana Kelly Nyoni esinye njalo isakhamuzi sakoBulawayo uthi abebutho sebehlala njalo nje besemqwaqweni besethusela uzulu.
“Kudala abebutho babengaphombu kubonakala nje bebhodabhoda kodwa khathesi kunzima esikubonayo ngoba bona okuthiwa bagcina ukuthula yibo abasihlukumezayo so ukuthi sithi sithakazelela ilanga labo kunzima ngoba sesihlezi sisesaba ukutshaywa lokuhlukunyezwa ngokwecansi libutho okumele lisivikele akuphileki nxa uhlala wethukile.”
Usuku lweDefense Forces Day lonyaka lunanzwa ngesikhathi kuphuma imibiko ethi kulabantu abathunjwayo, abanye betshaywa kuthi abanye njalo bebotshwa ngabakubutho lamapholisa behlangene.
Kodwa esethula umbiko wakhe wokunanza leli langa uMongameli Emmerson Mnangagwa uncome umsebenzi wabakubutho ethi sebeleminyaka engamatshumi amane besebenza ngobuqotho njalo belondoloza ukuthula elizweni. Uhle wathatha leli thuba lokubonga njalo uzulu ngokulandela iziqondiso zokulondoloza ukuthula lezokuvimba ukumemetheka kwegcikwane leCovid-19, ngalesikhathi ilizwe libhekane lokungahlaliseki langokuhlaselwa yilabo abathunywa ngamazwe aphetsheya abalenjongo yokugenqula umbuso wakhe okuvezwa yizijeziso zenotho ezefakelwa eleZimbabwe yilamazwe agoqela eleMelika.
Your browser doesn’t support HTML5
Udaba lokusolwa kokwenza kwabakubutho siluphiwa nguBathabile Masuku