Ukufuthelana kuhulumende womanyano sokufike kuzinga elibi, sokulokukhulumisana kubi phakathi kwamabandla akuhulumende lo phezu kwenkulumo zokuzama ukulungisisa konke okuhluphayo.
Icele leMDC elikhokhelwa nguMnu Morgan Tsvangirai lethule umbiko ngolweSihlanu lisola icele elikhokhelwa nguMnu Arthur Mutambara leZanu PF lisithi amabandla la kazimiselanga lakancane ukuthi inkulumo ziqalise kulungisiswe okuhluphayo okufana lodaba lukaMnu Gideon Gono loMnu Johannes Tomana.
ISadc Troika ilaye mhlaka 5 kuyonale inyanga ukuthi inkulumo phakathi kweZanu PF lamacele womabili eMDC kumele zibe seziqalisile kungakedluli amalanga alitshumi lanhlanu. Amalanga la anele ngolweSihlanu kungela kukhulumisana okukhona.
Ibandla likaTsvangirai lithi abecele likaMutambara baqakathekisa ukutshona bebhoda ngamazwe omhlaba kulokuthi bahlale phansi kukhulunyiswane. Imbiko le ilandulwe nguMnu Welshman Ncube owebandla likaMutambara.
Ingcwethi ecubungula ezombusazwe, uMnu Mlamuli Nkomo utshele uNtungamili Nkomo weStudio 7 ukuthi ukukhulumisana kubi lokhu kuveza sobala ukuthi amabandla akuhulumende womanyano lo kazimiselanga ukulungisisa okuhluphayo.