Abenhlanganiso elwela ilungelo loluntu eye Women Of Zimbabwe Arise – WOZA, bafole besiyakwethula incwadi yezikhalazo edale lephalamende kanye lenhlanganisweni yeZimbabwe Human Rights Commission ngoLwesithathu, besola inkulumo kamongameli Robert Mugabe yokuthethisa amaKhalanga labantu bonke baseMandebeleni.
AbeWOZA bathi bazakuqhubeka betshengisela ngendlela ezehlukeneyo, aze axolise uMugabe.
Yingoma ebihlatshelwa ngabe WOZA, abakade besedlula kancinyane ikhulu, inengi kungabesifazane, besiya kwethula incwadi yezikhalazo edale lephalamende.
Amapholisa alondoloza idale lephalamende enze yonke imizamo yokuvimba ukwethulwa kwalencwadi kumlawuli walo ngoba kuthiwa abeWOZA laba beze kungekho kuvumelana kuqala.
I Studio Seven yanelise ukukhulumisana lenkokheli ye WOZA phezu kwalokhu kutshengisela, okubalisa unkosazana Jenny Williams osola inkulumo kaMugabe, yokuchothoza abantu besiKhalangeni.
Unkosazana Williams uthi lokhu kutshengisela abakuqale koBulawayo kunsukwana ezisanda kwedlula, kwenziwa ngenjongo yokufuna ukwenza uMongameli akubone ukuphosisa akwenze ngenkulumo yakhe le njalo axolise kuzulu weZimbabwe.
Bebekhona abesiKhalangeni okubalisa unkosazana Vigilant Lunga, ongomunye wabayenikeza lincwadi emahofisini ohlangothi olubona ngezokulondolozwa kwamalungelo kazulu eye Zimbabwe Human Rights Commission.
UMaLunga utshengise ukukhathazeka kakhulu ngalenkulumo kamongameli yena njengowalolohlobo lwabantu besiKhalangeni.
Okuludaba olusekelwe ngomunye walamalunga aze elanda lokhu kukhankasela,evelela koBulawayo,okubalisa unkosikazi Joice Ndebele ethi kumzwisa ubuhlungu obuphindiweyo njengoba engomunye walabo abendele esiKhalangeni.
Lonkosikazi Nosizi Moyo waseKhezi, wakoBulawayo laye, uveze ukungaphathwa kuhle yinkulumo kaMugabe.
Unkosikazi Silibaziso Masiye obebukele abeWOZA betshengisela, ungomunye wabesifazane oveze ukukhathazeka.
Intathelizindaba ezine, lazo zike zathathwa zibuzwa buzwa, phezu kokuba bangobani, zibekwa umlandu wokuba sendaweni elondoloziweyo, zabuye zatkhululwa sekulaphayana ngemva kokuxwayiswa okukhulu.
Unkosazana Williams lomunye wakhe unkosazana Tambudzai, bake bathathwa labo okwesikhatshana ngamapholisa asebenza ecatshile.
Lokhu kungemva komthandazo owenziwe nguManangazira, wokuqhiba umkhankaso walamuhla phambi kwedale lephalamende.
Bakhululiwe ababili laba ngemva kokubahlukumeza amapholisa la ebebabeka umlandu wokweyisa umongameli lapho besithi akaxolise kunkulumo yakhe.