Izizalwane zakwele South Africa zitshengisele izolo emahofisini kaMongameli Cyril Ramaphosa eUnion Buildings ePitoli zisithi abahambe abokuza abangelamaphepha okuba elizweni leli okungekho emthethweni.
Izizalwane zakwele South Africa ebezitshengisela lezi zifike emahofisini kaRamaphosa zicula ingoma ezichothoza abokuza abangelamaphepha zisithi abaphume baphele kulelilizwe.
Bathi abantu bokuza kabangelamaphepha aqondileyo umele bephume bephele kwele South Africa
Umsekeli womkhokheli wenhlanganiso yeProgressive Forum of South Africa, uNkosikazi Carole Mbalati, utshele iStudio 7 ukuthi abokuza laba babathathela imisebenzi, bemukela iholo eliphansi njalo inengi labo badala amacala besazi ukuthi ngeke babanjwe ngoba bengaziwa.
“Sicela ukuthi bababuyisele ekhaya ngokushesha. Sicela ukuthi bahambe ekhaya ngokushesha balungise amaphepha abo. Siyabathanda asibazondi net sizonda izenzo zabo.”
South Africa protest over illegal immigrants
Amalunga enhlanganiso yeAction SA, ekhokhelwa nguMnumnzana Herman Mashaba owaziwa kakhulu ngokulwisa abaselizweni ngokungekho emthethweni kanye laweqembu leOperation Dudula, labo bebeyingxenye yokutshengisela lokhu. UNkosazana Boitumelo Talafala yena uthi akekho umuntu ongangenanje elizweni labanikazi engelamaphepha nxa kuyikuthi akalanhloso ezimbi.
“Asilwi nabantu abaphuma ngaphandle, esikushoyo yikuthi ma beza ecountrini yethu abeze bephethe amaphepha aright ukuthi ma besenza izinto eziphuma endleleni noma bephula imithetho yethu bayakwazi ukubanjwa accountable. They can account for izinto abazenzayo. Abangelamaphepha bafana lezipoki ezihamba la endleleni.”
UNkosazana Katlego Mphahlele yena uthi labalamaphepha kodwa besebenza imisebenzi engenziwa yiloba ngubani kwele South Africa labo abasafuneki ngoba labo bayayifuna leyo misebenzi.
South Africa protest
“Yah kufanele bahambe ngoba those are skills that amaSouth Africans can provide like doing gardening, being a waitress in a restaurant, ayifuni iqualification. You can do those duties without amaphepha.”
Kodwa-ke inhlanganiso ezilwela amalungelo oluntu zidla amalahle zisithi inhlelo zokuzingelwa kwabangelamaphepha eziqhutshwa ngamapholisa, abogatsha lwendaba zasekhaya labogatsha lwezemisebenzi, yizo ezitshotshozela inzondo phakathi kwezizalwane zakwele South Africa labantu bokuza. UNkosikazi Sheron Ikhambaram owenhlanganiso yamagqwetha ezamalungelo eyeLawyers for Human Rights uthi abokuza laba okuthiwa abalamaphepha bayawafuna la maphepha kodwa abawaphiwa.
South Africa
“Osekusenziwa yikwephulwa kwamalungelo eziphepheli esesingakubiza ngokuthi yixenophobia ngenxa yokuthi bancitshwa amaphepha ikakhulu izizalwane zezwekazi leAfrica qede lapho babanjwe babotshwe kuthiwe yindaba bengelawo.”
Iziphathamandla zehofisi kaRamaphosa zilwemukele ugwalo lwezikhalazo zabebetshengisela laba zathembisa ukuthi bazayithola impendulo.
Ugatsha lwendaba zasekhaya lona lusanda kutshela iphalamende ukuthi alulwi labantu bokuza kodwa lufuna kulandelwe umthetho othi bonke abangena elizweni kufanele babe lemvumo yokungena.