Ngesikhathi abesifazana kwele South Africa begqiba inhlelo zokuthakazelela inyanga yabesifazana ekaNcwabakazi, abesifazana abadabuka eZimbabwe abahlala elizweni leli bathi inhlupho abahlangano lazo sezizinengi okokuthi sebephila ngomusa weNkosi. UThuso Khumalo usipha loludaba eseJohannesburg kwele South Africa.
Abesifazana laba abasebenza njalo abahlala kwele South Africa bathi kubo yizililo zodwa ngesikhathi kuthakazelelwa inyanga yabo mama. Owesifazana weZimbabwe uNkosazana Pamela Ncube uthi sebephila njengabomabonabulawe indawo zonke.
“Njengoba libona ukuthi asisibo balapha. Asikho safe. Uhamba estradeni usuthathelwe ifoni usudutshuliwe. Lakhonale sizwa kuthiwa sekuhlukunyezwa.”
EleSouth Africa lethula inyanga kaNcwabakazi njengenyanga yabomama. Lesi yisikhumbuzo sabomama abedlula izinkulungwane ezingamatshumi amabili - 20,000, abaqunga isibindi, basukuma bayatshengisela emahofisini kahulumende woncindezelo eUnion Buildings ePitoli mhlaka 9 Ncwabakazi 1956. Babezondiswe yikwethulwa ngomnyaka ka1952 kwamaphepha ama-pass okwakumele athwalwe sonke isikhathi ngabansundu.
Abesifazana abadabuka eZimbabwe abahlala kwele South Africa bexoxisana ngobubahluphayo
Ngale inyanga uhulumende weSouth Africa uqhuba inhlelo ezitshiyeneyo zokuqinisa amalungelo abesifazana, ukuxhaswa kwabo kwezamabhizimusi lemikhankaso yokuphiwa kwabo amathuba okungena ezikhundleni eziphezulu.
Kodwa-ke abesifazana beZimbabwe bathi kubo kukomnyamubambile, njengoba kumnyama emuva laphambili.
UNkosikazi Sithandile Dliwayo uthi inani lezehlakalo zokudlwengulwa lokubulawa kwabomama sekusenza bahambe bethithibele. Ngokwezibalo zogatsha lwezamapholisa kwele South Africa enyangeni ezintathu kuphela zakuqala zomnyaka ka2023, kudlwengulwe abesifazana abedlula izinkulungwane ezilitshumi 10,516 kwabulawa abedlula amakhulu ayisitshiyagalolunye - 969.
“Yeyi kubuhlungu kakhulu ikakhulu thina esizele amantombazana. Nomuhleli, nomu umntanakho umthuma ukuthi ahambe esitolo uyathandaza ukuthi abuye ephephile. Ngoba manje akusalunganga uyahlangana lomuntu wesilinga amnikeze u R2 ma efika ngale uyamdlwengula umntwana.”
Abangelamaphepha okuba kwele South Africa ngokusemthethweni bathi sekunzima kakhulu ukuthi baphume bayephandela imuli zabo. Banengi njalo asebeze bangena emsebenzini wokuthengisa ucansi ngenxa yobunzima bempilo lokusilela kwemisebenzi.
Abesifazana baxoxa ngababhekane lakho kwele South Africa
Kodwa kulo umsebenzi lakho bayahlukunyezwa lokubulawayo. Sikhulumanje umthethwandaba uphakathi kokuthonisisa uSifiso Mkhwananzi okucatshangelwa ukuthi wabulala abathengisa ucansi abayisithupha eJohannesburg okugoqela labe Zimbabwe.
Abangelasibindi sokungena kulomsebenzi bazithola sebetshaya umasihlalisane labesilisa abangabathandiyo, okuyimitshado lapho abanye ababhaxabulwa khona imini lobusuku kodwa bafele ngaphakathi ngoba kuyilo ubhalu abacatshele kulo inkinga zempilo. UNkosazana Langelihle Sibanda uthi baphakathi kwetshe lembokodo.
“Siyacela kuhulumende both oweSouth Africa laseZimbabwe ukuthi nga bayasingenelela singabafazi sikwazi ukuphepha. Sikwazi ukuthi noma sihamba ezitaladeni sibefree. Nabobaba esihlala labo ezindlini ma bengaphenduki izilwane.”
Omunye wesifazana weZimbabwe ongathandanga ukuvezwa igama uthi lamabhizimusi abawazamayo ayabhidlika ngoba bengelalo uxhaso lwezamakhono lemali.
“Ngiphila ngokuthengisa amavegie emgwaqweni. Esihlangana lakho kulezi nsuku kunzima. I Home affairs, pholisa ma uthi uyafaka istuff sakho phansi nampa sebekhona. Ubuthe kuchithekele phansi. Plus lokuthenga these days abantu abathengi. Istuff siyabola ucine uchitha usiyalahla.”
Nkosazana Victress Mathuthu
UNkosazana Victress Mathuthu, umgcinisihlalo wenhlanganiso yeZim Imbokodo, elwela amalungelo abesifazana uthi omama sekufuze basukume basebenzise inhlelo ze-internent ukukhangisa amabhizimusi abo njengoba sebelahliwe njengomhlambi kazelusile.
“Asike sikhangeleni lamathuba akhona esingenza ngawo amabhizimusi ekhaya. Ma zikhona intuba zokungena ukuthi sifinyelele ekhaya singene lakumabhizimusi ekhaya. Phela impilo yethu ayipheleli lapha njengabomama.”
Kodwa-ke umphathintambo obona ngokuhlelwa kwezidingo zomphakathi ehofisini kamongameli, uNkosikazi Maropene Ramakgopa, uthi kufanele abeZimbabwe laba badinge amaphepha aqondileyo ukuze uhulumende abagoqele enhlelweni zezidingo zempilo.
“Umanqoba kikho konke lokhu yikuthi abantu babelamaphepha aqondileyo wokuba selizweni. Lokhu kuzenza sazi ukuthi ungubani njalo zidingo bani olazo ukuze sihlele kahle ukukupha zona.”
Kodwa-ke abesifazana laba bathi njengoba ukutholakala kwamaphephala kulukhuni okwempi yengidi lelahle, sekusezandleni zingaMvelingqangi ukutsho ukuthi ziyowelaphi induku loxakuxaku.