Ugatsha lomanyano weUnited Nations olubona ngenhlalakahle yabantwana olweUNICEF luthi kulabesifazana abayizigidi phose ezingamakhulu amane, 370 million, emhlabeni jikelele abaphilayo namuhla abadlwengulwa bengabantwana bengakafikisi iminyaka yokuzalwa elitshumi lasitshiyangalombili, 18 years, okuludubo olubhahe kakhulu eZimbabwe.
Kugwalo lwayo lokunanza usuku lweInternational Day of the Girl Child, iUNICEF ithi amazwe asemhlubulweni weSub-saharan Africa, yiwo ahamba phambili kuzehlakalo zokudlwengula, ngabantwana abayizigidi ezingamatshumi phose ayisitshiyangalombili, 79 million, elandelwa ngamazwe asempumalanga kusiya ngasezansi yezwekazi leAsia wona alabantwana abangu73 million asebeke badlwengulwa.
IUNICEF ithi nxa kubalwa labesifazana abahlukuluzwe ngokocansi kodwa kungela kudlwengulwa phakathi bedlula izigidi ezingamakhulu ayisikhombisa, 650 million emhlabeni jikelele abahlukuluzwe ngalindlela.
Umbiko lo uza ngesikhathi abesifazana beZimbabwe bekhala ngokuthi ziyanda izehlakalo zokudlwengulwa ikakhulu kwabantwana.
Imizekeliso igoqela umntwana obelethe eleminyaka eyisitshiyagalolunye, 9 years, kuminyaka emibili edluleyo ngemva kokudlwengulwa kanye lomunye oleminyaka elitshumi lantathu, 13 years, obikwa edlwengulwe ngumfundisi, obelethe ngeviki edluleyo.
Olwela amalungelo abesifazana uNkosazana Linda Mpofu utshele iStudio 7 ukuthi abesilisa kumele babambe iqhaza ekuqedeni udubo lokudlwengulwa kwabesifazana.
Ngenyanga edluleyo uMongameli Emmerson Mnangagwa usayine umthetho weCriminal Laws Amendment (Protection of Children and Young Persons) Bill, owenza kube licala ukuya emacansini lomntwana olemininyaka engaphansi kwelitshumi lasitshiyangalombili, 18 years.
Your browser doesn’t support HTML5
Ingxoxo loNkosazana Linda Mpofu