Abokholo lwesi-Islam lesiKhristu bathi impi ye-Israel leHamas idinga ukuthi kubuyelwe muva kukhangelwe ukuthi yaqalela ngaphi ukuze imiswe.
Lokhu kukhulunywe ngalesi sikhathi sekulabantu abafika phose inkulungwane ezinhlanu – 4,800 asebebulewe kulimpi.
UMongameli Joe Biden wakwele Melika oseIsrael lenhloko lomkhokheli wakwele Bhilithane uMnu. Rishi Sunak oseJerusalem sebazise ukuthi bama le-Israel kulimpi besithi ilelungelo lokuzivikela.
Umgcinisihlalo wenhlanganiso efundisa izifundo zokholo lwesi-Islam eyeMakomborero Insikelelo Trust, uSheikh Laja Yasin, uthi udaba lolu lwaqala kudala ngomnyaka ka1947.
Welekelele esithi impi le ingaqedwa kuphela yikuthi kufakwe amakhanda ndawonye kwenziwe izivumelwano ezizalandelwa.
Umfundisi Useni Sibanda ongumqondisi wenhlanganiso yokholo lwesiKristu eyeZimbabwe Christian Alliance uthi impi le ibangelwa yikwehlukana kwemibono yezokholo.
Ekhuluma leStudio7, ingcwethi yezombusazwe efundisa ekolitshini le-National University of Science and Technology, uMnu Stevenson Dlamini uthi ukukhangelisisa imbali yalimpi kuqakathekile.
Owayeyintantelizindaba eyaziwayo kakhulu eZimbabwe njalo esesebenzela ebhilithane uMnu Bekithemba Mhlanga uthi laloba impi le ileminyaka ilakho ukuphangisa ukuphela.
Impi le isitshiye abantu abafika phose isigidi sebelahlekelwe yimizi eGaza njalo yabulalisa abafika phose inkulungwane lengxenye – 1,400 e-Israel labanye abazinkulungwane ezintathu lamakhulu amane – 3,400 eGaza.
Your browser doesn’t support HTML5
Udaba lwe-Israel leHamas esilwethulelwa nguTaboka Ncube