Abenhlanganiso ezehlukeneyo kunhlangothi ezehlukeneyo zempilo bahlangene ekolitshini eleNUST, koBulawayo bexoxisana ngengozi ezidibana labantu besemsebenzini ezifana lokukhubazeka engqondweni ngenxa yokonakala komnotho welizwe.
Emhlanganweni lo, kuvele ukuba abaqhatshi ababoni ukusindwa yimicabango kungumkhuhlane ofana leminye nje, ngakho izisebenzi zizithola ziphakathi kohlupho lokuba ziphumele egcekeni kubaqhatshi.
Abaqhatshi sebekhuthazwe ukuthi bananzelele impilakahle yezisebenzi egoqela imikhuhlane yenqondo ngoba inengi labantu ligula lifihla ngenxa yesimo somnotho welizwe okungaphambanisa impumela yamakhampani abo.
Udokotela Mthabisi Anele Bhebhe uchaza ukuba umkhuhlane wokusindwa yimicabango ujayelekile, njalo inengi labantu lilawo.
“Nxa sikhangela umkhuhlane wengqondo, sithi umuntu ocabanga kuhle, kumbe olengqondo ezisebenza kuhle ngumuntu lowu okwanisayo ukuya emsebenzini, ekwanise ukucabanga kuhle nxa engahlangana lezinto ezimhluphayo, i stress, akwanise uku handler ama issues wonalawo. Njalo kube ngumuntu owenelisa ukuphila labanye ku society. Nxa sekuthwa umuntu sele mental health problem, ngumuntu lowu obona sekunzima ukuthi aphilisane labanye, uyabe ecabanga kulento emudlayo.Ngakho ukuhlupheka, ukucabanga kakhulu ngumkhuhlane wengqondo ojayelekileyo njalo inengi lethu silawo.Umuntu engazithola elomkhuhlane wegqondo akusela ngakho ehlupheke ethi nguye yedwa esigabeni, kumele siqinisane sithole usizo ”
Umnumzana Makhosi Tshalegwa onguye okhangele izisebenzi seKhansili uthi njengabaqhatshi bebengakafiki esibangeni sokuthi babe lolwazi ngomkhuhlane wokusindwa yimicabango uma bekhangelane lezisebenzi zabo.
“Indaba ze mental health, yindaba ebezingaka publicizer kakhulu ukuthi zazakale ebantwini abanengi.Okunga ngokuthi kunzima ukuthi nxa uvuka ekuseni ungu manager uzwe isisebenzi sikufonela sisithi ngile mental health problem ngicela ukuthi ngingaze ngabuya emsebenzini. Besingakafiki kuleso sigaba sokuthi abantu babe lolwazi olunganga lonalelo.Kodwa ke ama wellness programs awe physical health besisiba lawo lanxa lapha lalaphana i mental health besiyidobha, besingakaze sibe lenhlelo ezikhangela kanye ziqondane nqo le mental health. ”
Omunye wabaqhatshi umnumzana Sikhumbuzo Baloyi obemele inkampani elungisa imbiza lemiganu, eyeKANGO uthi ukuze inkampani iphumelele kuhle kuyadingeka ukuthi izisebenzi zibe lempilakahle lasengqondweni.
“Sinanzelela ukuthi izisebenzi ukuthi zenelise ukuba productive enough, ama targets ayabe efakiwe, benelise ukuthi i company iphumelele yikuthi babe lempilakahle lokhu esikuthi yi mental health. Thina ke njenge organization ukuze sincedisane lezisebenzi zethu yikuthi zibe lempilakahle. Ngoba sinanzelela ukuthi isisebenzi esiphila kahle engqondweni yisisebenzi esenelisa ukusebenza kahle.”
Omunye osakhulayo osebenza koBulawayo unkosazana Duduzile Mathema uthi yena ulaso isibindi sokutshela umqatshi wakhe ukuthi kaphathekanga kuhle engqondweni.
“Ngingaba lesibindi sokuthi ngitsheyele ucingo umuntu engimsebenzelayo, ngimazise ukuthi angenelisi ukuba sense benzine ngoba kukhona okwenzakalayo nxa sikhangele indaba ze mental health.Mina isibindi ngingaba laso sibili kodwa ukuthi ngingamtshela through i telephone conversation ngeke ngikukwanise lokhu kodwa engingakwenza ukuthi ngimtshele ngingakhuluma laye through watsapp, then sengifona ngisenza i follow up ukuthi mqhatshi ungabe ubonile na imlayezo lapho ebengisitsho into efana lale.”
Abenhlanganiso ezehlukeneyo bebexoxa ngomkhuhlane ongahlasela izisebenzi oyikukhubazeka kwengqondo. Kuvele ukuba abaqhatshi abanengi bebengaboni umkhuhlane lo ngelihlo elifana leminye nje imikhuhlane ejayelekileyo. Ngakho izisebenzi zithwala nzima ukuthi zichaze ukuthi ziphatheke kubi ngomkhuhlane wokusindwa yimicabango.
Abaqhatshi sebecetshiswe ukunakekela impilakahle yonke yezisebenzi egoqela lokukhangela ukuhlaliseka kwengqondo.Njalo inkokheli lezi zithembisile ukuletha inguquko kuzisebenzi ngoba sebenanzelele ukuba ukuze inkampani iphumelele kuyadingeka ukuthi izisebenzi zibe ziphilile engqondweni.
Your browser doesn’t support HTML5
Udaba lomkhuhlane wokusindwa yimicabango siluphiwa nguBathabile Masuku