Abenhlanganiso yeMunicipal Review bahlangane labekhansili yakoBulawayo bexoxisana ngokuthi ikhansili kumele iqhube inhlelo zayo ngokusegcekeni njalo ithuthukise izakhiwo ezisedolobheni leli.
Izakhamizi zamukele ngenjabulo ukuqhutshwa kwalumhlangano zisithi uzivule amehlo entweni ezithize okwenze zafunda okunengi ngomsebenzi wekhansili yakoBulawayo.
Umkhokheli wehlanganiso yeThe Municipal Review umnumzana Bukhosibenkosi Moyo uchasisa kabanzi ngenjongo yalumhlangano.
“Injongo yethu yikuthi sifuqe umanisipala wethu ukuthi enze umsebenzi wakhe ngendlela okumele enze ngawo. Khathesi siqalise uhlelo oluthiwa yi My City Conversations lapha esihlanganisa khona abantu ukuthi sixoxe ngendaba ezenzakala koBulawayo, injongo kuyikuthi nxa abantu bexoxa ngokwenzakalayo kuzakuba lengqubekela phambili abantu behamba ndawonye, bedonsa ndawonye”
Unkosikazi Nesisa Mpofu isikhulumeli seKhansili yakoBulawayo uthi kuyadingeka ukuba uzulu asondele eduze ngoba idolobho lingelabantu hatshi elikaKhansili.
“Besibuyile lapha ku City Conversation ngoba siyananzelela ukuqhakatheka kokuxoxisana lama residents ako Bulawayo.Siyakwazi ukuthi ukukhulumisana kuyalungisa izinto ezinengi. Okokuqala kuyayenza ukuthi siliphe i correct information from council ngoba sifuna ukuthi information ifike ebantwini ngesikhathi njalo ngendlela eyiyo. Njalo siyenelisa ukuthi sikhulumisana sibuzane ezinye izinto mhlawumbe ebesingazizwisisi, okunye sikubonayo yikuthi kulesidingo sokuthi ama residents ako Bulawayo asondele eduze labantu lathi ikhansili sisondele ngoba idolobho leli ayisilo lekhansili ngelabantu , sisebenzela bona abantu ukuthi besitshele ukuthi bafisa ukuhanjiswe njani ngedolobho.”
Umnunzana Jabulani Mlotshwa obona ngokwakhiwa kwamadolobho uthi uBulawayo lamuhlanje uhlambulukile ngoba wakhiwa ngokukhaliphileyo.
“Besikhangela ukuthi imizamo yobucwephetshe obungasetshenziswa ukwakha umuzi wakoBulawayo ngendlela eloswane, ejiyilelyo singakuphatha kanjani. Sikhangela ukuhlakanipha lolwazi lwasendulo ukuthi uBulawayo wayevele efakwe ngaphi, lalamuhlanje uBulawayo uhlambulukile ngoba wafakwa ngethi usemqogweni ukwenzela ukuthi ukuphila kwakhe kube yindlela enhle.”
Omunye wabasakhulayo unkosazana Sinokuthabo Mbambo ukhuthaze abatsha njengaye ukuthi baphatheke emihlanganweni yokwakha uBulawayo.
“Engikufundileyo kakhulu yikusebenza kwe City Council ekade ngingakwazi.Ikakhulu ama innovations ayenziwayo koBulawayo lokuthi bacabanga ukuthi balungise ama parks esilawo. Ngithanda ukukhuthaza i youth ngoba intsha yithi ama leaders akusasa.So ngibakhuthaza ukuthi si attender ama meetings awama wards ngoba yikho lapho esithola khona ukuthi sikhulume kabanzi nge kasi lapho esihlala khona kanye lenkinga esihlanganalazo.”
Omunye wabafundi uMthabisi Dube uthi unanzelele ukuthi nxa abantu bekhulumisa kulamacebo amanengi aphumayo angenza uBulawayo athuthuke.
“Ukuba lapha lamuhlanje kungibonise izinto ezehlukeneyo njalo ukukhuluma ngezinto okumele sizenze singuBulawayo kwenza sithole indlela zokuqhubekela phambili ukuthi singenza njani ukuthi idolobhe lethu libe ngelingcono.Njalo eyinye yezinto engizibonileyo yikuthi nxa abantu behlangana bekhuluma siyathoala amacebo okuthi singenza njani. Ma singuBulawayo eyinye into engibona engathi ingenzakala nxa singadinga indlela yokuthi sense amagetsi singuBulawayo njalo siding indlela zokuthola amanzi a clean ngaphandle kwawe zulu, singaqhubekela phambili njalo impilo zethu zibe ngcono.”
Umhlangano lo oqhutshelwe ekholitshini leNUST American Space, koBulawayo uhlanganise abakaManisiphala yakoBulawayo, izakhamizi, abamakhampani ehlukeneyo, osomabhizimusi kanye lezikhwicamfundo zokwakha, amaArchitect.
Your browser doesn’t support HTML5
Udaba lomhlangano wekhansili yakoBulawayo siluphiwa nguBathabile Masuku