Ibandla le MDC T elikhokhelwa nguMnu. Douglas Mwonzora lithi lizaxotsha amalunga edale lephalamende abazalandela ibandla elitsha elibunjwe nguMnu. Nelson Chamisa NgoMvulo, ele Citizens Coalition for Change (CCC).
Isikhulumeli secele leMDC-T leli, uMnu Witness Dube uthi bazakwenza lokhu belandela isisekelo sombuso we Zimbabwe othi nxa Ilunga ledale le phalamende lingasuka kubandla elangena ngalo edale kumele lisuswe esikhundleni.
UMnu Dube uthi wonke amalunga ephalamende azavele alinge ukulandela uChamisa azazibonela okwabonwa yingidi.
“Umthetho welizwe ucacile ngale indaba. Nxa umuntu etshiya ibandla elamvitelayo esiya kwelinye. Kumele akhitshwe. Akula ozasala ohambe kubandla layizolo”
Lokhu kuza ngemva kokuba uChamisa esungule ibandla lakhe elitsha elilombala wethanga okulinyathela elamukelwe ngabanengi abathi ube ezathathelwa abasekeli nguMwonzora yena othi uzasebenzisa ibizo lokuthi MDC Alliance ku khetho lwama By-elections olwenziwa ngoMbimbitho mhla ka 26.
U-Dube uqhubeke ethi okwenziwe nguChamisa kuveza ukuba iMDC ekhokhelwa ngu Mwonzora yiyo iMDC yoqobo.
“Bekumele bahle batshiye bodwa. Bebefuna ukuthwala amalunga eMDC bewase emagangeni. Bafuna ukwala becupha amalunga eMDC, kulokuthi sakhe esakutshiyelwa ngu baba uTsvangirai benza into ezingela msebenzi”
Ummeli we Hwange Central edale lephalamende uMnu Daniel Molokele uthi yena akala ndaba engaze exotshwe esithi uselandela ibandla le CCC.
“Mina ngiyakwazi ukuthi ngathi ngisuka eGoli ngisiza ekhaya ngalanda ukuzesebenza lo zulu. Ibandla esilaziyo ukuthi limela abantu yilelo elikhokhelwa ngu Mongameli Chamisa. UMkhokheli wami ngu Chamisa angiyi kweyinye indawo”
Elinye icele leMDC T elikhokhelwa ngu Nkosazana Thokozani Khupe lithi lona alisoze lizihluphe ngalabo abaku CCC kodwa lizaqala ngokuxotsha labo abakucele lika Mwonzora. Lokhu kuchazwe yisikhulumeli se MDC T ka MaKhupe uMnu Ntando Ndlovu.
“Into engingayitsho yikuthi iphalamende ye Zimbabwe ilamabandla amanengi. Abantu esizabaxotsha ngasebenze I MDC Alliance. Laba sizabaxotsha ephalamende. Okwe CCC asikakuzwa”
Izolo uChamisa wazise uzulu ukuba usebumbe ibandla lakhe ele Citizens Coalition for Change (CCC).
Uthe bathethe leli nyathelo ngemva kokuxokozela lokudonselana okudalwe yikuba uMwonzora okhokhela elinye lamacele aweMDC-T, eye emthethwandaba waphezulu oweSupreme Court esithi akula munye umuntu okumele avunyelwe ukusebenzisa ibizo lokuthi MDC.
U Mwonzora uhle wagijima wayabhalisa kwabekomishini ebona ngezokhetho eye Zimbabwe Electoral Commission ukuthi nguye umkhokheli weMDC Alliance obe kuzaphazamisa abasekeli bakaChamisa bacine sebevotela uMwonzora.
Ele Zimbabwe lizakuya kukhetho lwama by elections ngo Mbimbitho wawonalo umnyaka kuthi kumnyaka ozayo kuzakuba lokhetho lwenkokheli yone yelizweni, kuqalisela kubohulumende bezabelo, amakhansil, amalunga edale lephalamende kanye lomongameli welizwe.
Your browser doesn’t support HTML5
Udaba lokudinga ukuxotshiswa kwabeCCC edale lephalamende siluphiwa nguMlondolozi Ndlovu