Abebandla leMDC Alliance bathi loba bengatholanga imali okwakumele bayithole kuhulumende, benelisile ukuqhubeka ngenhlelo zabo lokubhadalela indleko ezigoqela iholo lezisebenzi.
I MDC Alliance ithi ingwalo zabo email zihlanzekile njalo ibandla lile mali eneleyo yokusebenzisa.
AbeMDC Alliance besethula iAudit Report yabo eHarare
Ekhuluma lentathelizindaba eHarare umgcinisikhwama weMDC Alliance, uMnu David Coltart uveze ukuba inkampani ye Auditax International yiyo eqhatshwe ukuba icubungule amabhuku ayo email, i-Auditing. Ukucutshungulwa kwamabhuku aweMDC Alliance kuza ngesikhathi kulemibiko ebisiphuma kumaphephandaba isithi inkokheli yebandla leli yantshontsha izigidi ezimbili zamadola e Zimbabwe- 2 million.
UColtart uveze ukuba inkampani le, icubungule ukusetshenziswa kwemali eyaphiwa ibandla nguhululumende lemali eyavela kumaluna ayo ngomnyaka owedluleyo ka 2019. Ethi ibandla lakhe lenze lokhu ukuze uzulu lohulumende we Zimbabwe afunde ukuba imali zikazulu kumele zisetshenziswe kakuhle.
“Sifuna ukutshengisa ukuba izinto ezinhle ziqala ngekhaya. Kumele silethe inguquko esifuna ukuyiletha kuzulu wonke. Sisenza icongress yethu eGweru kumnyaka ophelileyo savumelana ukuba sizakwenza izinto ezizenza singasolwa nguzulu”
Uqhubeke uColtart ethi lokhu abakwenzileyo kuyinto okumele ilandelwe zinhlanganiso zonke zeZimbabwe.
“Lokhu esikwenzayo kungenza engathi kuyinto encane kodwa kuyinto ezakuba nkulu hatshi kubandla leli kuphela kodwa emuntwini wonke. Siziletha kuzulu ukuba acubungulisise limali ikakhulu kumali esayithola kuzulu we Zimbabwe”
Unobhala wabatsha kuMDC Alliance uMnu Gift Ostallos Siziba uthe ibandla leli lizaqhubeka likubeka sobala ukuba lisebenzisa njani limali.
“Esikwenzileyo njenge MDC, yikuthi sense iaudit yemali esayiphiwa ngabantu, languhulumende. Lokhu sikwenzele ukuba silandele umthetho webandla lethu lokuba sense abantu basithembe”
Intathelizindaba azenelisanga ukuhlola ingwalo zemali ezeMDC Alliance kodwa uMnu Coltart uthe bazimisele ukupha intathelizindaba umbiko wengwalo zemali lezi, iAudit Report.
AbeMDC Alliance bathi kodwa badaniswa yikuba imali obekumele bayithole evela kuhulumende isisiya kubandla le MDC-T elikhokhelwa nguNkosazana Thokozani Khupe besithi lokhu akukho emthethweni.
Ngemva kokuba ibandla le MDC-T elikhokhelwa nguMaKhupe seliphiwe imvumo yokuba lilakho ukuxotsha amalunga edale lephalamende abavotelwa bekubandla le MDC Alliance, iMDC Alliance yahle yehluleka ukuthola imali efika izigidi eziyisikhombisa zamadola-7 million eyayimele ivele kuhulumende.
Ingcitshi zithi okwenziwe libandla le MDC Alliance akujayelekanga njalo kumele kube yisibonelo esihle kumabandla wonke ezombusazwe kanye lenhlanganiso ezizimeleyo.
NgoNhlolanja lonyaka kwaphuma umbiko othi abeMDC Alliance banyamalalisa izigidi ezimbili zamadola eMelika. Lumbiko ophume kuphephandaba leNewsday uphikiswe libandla leli kodwa umonakalo wawuvele usudaliwe ngoba ngemva kokuphuma kwawo kwenza ukuba labo abanceda ibandla leli bathukuthele.
INewsday yabika ukuba ukunyamalala kwemali le, yikho okwenza kube lophenyo lokudingisisa ukuba imali le ingabe yasiwa ngaphi, ibandla lahle lasungula uhlelo lokuthi kucutshungulwe ingwalo zemali emizameni yokuzihlambulula ngoba besesabela ukuthi ababancedayo ngemali bangathukuthela ngamandla, kodwa uColtart ukulandule lokhu lapho ebuzwa intathelizindaba.