Inhlanganiso eye National Transitional Justice Working Group Zimbabwe (NTJWG), isikhuthaze ikomishini yeNational Peace and Reconciliation Commission (NRP) ukuthi ifinyelele izizalwane zeZimbabwe ezisemazweni atshiyeneyo ukuze izwe imibono yabo njalo lokuthi bafuna ikomishini le isebenze njani ukuze baxole ngokuhlukuluzwa okwenzakala kubo lemuli zabo.
Abangene lunmhlangano eJohannesburg baveze obala ukuthi abathokozi ngitsho lakancane indlela ikomishini yoxolo eye NPRC esebenza ngayo.
Bathi inengi lamalunga ale ikomishini avela kuhlangothi olulodwa lwelizwe okuzenza yehluleke ukuhluza kuhle ukuhlukunyezwa okwenziwa abantu abatshiyeneyo endaweni ezehlukeneyo zelizwe.
Bathi njalo ukuthi likomishini isibhode ilizwe lonke yehluleka ukubafinyelela emazweni okulabantu abanengi ababalekela ukukubulawa, ukutshaywa, ukwethuselwa lokuhlukunyezwa, kutsho ukuthi ayiwazi umsebenzi wawo.
Isiphathamandla senhlanganiso NTJWG, uNkosazana Samukeliso Khumalo, uthi abakuthole kulo umhlangano kutshengisa ukuthi likomishini le ayikaqalisi ukusebenza.
“… Bayafuna ukuthi icompensation ibekhona ukwenzela ukuthi nxa bebuyela ekhaya babelakho lapha abaqalisela khona njalo abanye bathi bona umuntu onjengo Mnu. Robert Mugabe owayenguye okhangele iGukurahundi kumele ukuthi ahambe emthethwandaba ayekutsho ukuthi yindaba kwenzakala lokho okwenzakalayo, njani kusenzelwani.”
Abasemazweni laba bathi ukutshiywa phandle kokhetho bona bebalekele ukutshaywa kakhulu ngesikhathi sokhetho, yinto okufanele ibhekwe ngamelo amakhulu yile ikomishini.
Inengike elilezihlobo zalo ezabulawa ngeGukurahundi lizonde liganunwabu lisithi elikufunayo yikuzwa ukuthi ababulalayo ngobani bebulalelani, kuphi, njani kanye lezijeziso zabo.
Isizalwane seZimbabwe, uMnu. Mlungisi Tshabalala, uthi ngeke abantu bexole bengaphiwanga ithuba lokuphanda izihlobo zabo ezangcwatshwa butshapha ukuze bazingcwabe ngesizotha kanti ufuna njalo kukhangelwe lokusalela emuva kwendawo ezazihlaselwa nguhulumende.
“Into abangayenzanje yicommunity development abangayenza. Yonke i empowerment abangayenza, kundawo zonke okwaziwa khona ukuthi iGukurahundi yatshaya ngamandla. Into futhi enye eqakathekileyo yiyonale eyokuthi kube labantu abavumayo ukuthi ngempela yenziwa lento.”
Igqwetha elilwela amalungelo oluntu, uMnu. Dewa Mavhinga, oyisiphathamandla senhlanganiso ye Human Rights Watch, uthi inengi lifuna lenhlawulo ezakwenza benelise ukwenza ezinye zezinto abehluleka ukuzenza sebebulawelwe abazali babo.
“Besicela kakhulu ukuthi iNational Reconciliation Commission ikhangele ukuthi abantu bahlala njani. Bafunani bona abantu bakoBulawayo ngenxa yeGukurahundi, abantu bakoChiyadzwa ngenxa yama diamond, ukuthi ahambe njani, so kunengi okufuna ukuthi kwenzakale eZimbabwe ukuthi kube lokuthula lokuphumelela eZimbabwe.”
Abasemazweni laba bathi bafuna lemibiko yamanye amakomishini afana leDumbutshena Commission avezwe obala ukuze babe leqiniso lokuthi i NPRC ayisoke ibachithele isikhathi iqoqa umbiko ozaphinda utshwathikwe emahofisini kamongameli welizwe.