Omama beGwanda behlise ezimathonsi phambi kwekhomidi yephalamende ebona ngezenzakala phakathi kwelizwe bekhala ngenhlupho abahlangana lazo lapho befuna incwadi zokuzalwa amabirth certificates okudala ukuthi abantwana behluleke ukufiacaanyelela ezemfundo.
Amalunga edale lephalamende ehlangana lezakhamizi zeGwanda
Uzulu ongene lumhlangano uthi uhulumende kumele aguqule imithetho yokuthatha incwadi zokuzalwa esithi idala ukuthi inengi labantwana kulesi sabelo lingatholi lezincwadi okubangela ukuthi abantwana behluleke ukufinyelela ezemfundo.
Lumhlangano wenziwe ngemva kokuba inhlanganiso yabatsha eyeCommunity Youth Development Trust CYDT ibhalele idale lephalamende ikhonona ngenani labatsha abangela ncwadi zokuzalwa lulesisiabelo.
Osakhulayo uSibongiseni Mthombeni oyintandane eleminyaka elitshumi lasikhombisa osuka koMzimuni wehlise inyembezi lapho ebikela iqula lephalamende ukuthi setshiye isikolo ngoba engalayo ibirth certificate.
“Umama wabhubha ngisesemncane logogo ozala umama bathi sebebhubhile ngathathwa ngugogo ozala ubaba.Ugogo ozala ubaba ngahlala laye kodwa ubaba kakho useGoli angimazi ngafunda ngaze ngayakuthi Fomu 4, ngiyehlulekile ukubhala uFomu 4 ngenxa yokuthi angila birth ,ugogo uzamile ukungithathela ibirth wehluleka ngenxa yokuthi kuthiwa kufuneka ideath kamama kathesi angifundi ngenxa yokuthi angila birth.
UNkosikazi Nomvula Ndlovu wethule udaba oluzwisa usizi.Uthi umntanakhe wambalekela emtshiyela umzukulu omuncane osekumele aye esikolo kathesi inkinga sekufunakala uyise womntwana ukuze athole ibirth certificate.
“Bathi ngibuye lobabakhe ubabakhe ngizambona nga, emapholiseni ngareporter ngesikhathi umntwana engibalekele wangitshiyela umntwana .Emapholiseni ngithe ukuhamba kwami bathi ngihambe kumpholisa engangi report kuye ngesikhathi umntwana ebaleka mina umpholisa lo angisamazi, ngiyambona nga?
UNkosikazi Progress Sibanda oweSitezi obesemhlanganweni lo, uthi ulomakhelwane olomhkhuhlane wengqondo obhekane lobunzima bokutholela abantwabakhe amabirth cerificates osekudala ukuthi bengasayi esikolo.
“Okwakathesi ulabantwana ababili labo angazange wabakwazi ukuthi uyise ngubani ngoba ngumuntu ophambanisekileyo bamele ukubhala uGrade 7 bekumele baregister bekuGrade 6 kathesi so abenelisanga ukuregister uGrade 7 kutsho ukuthi kungenzakala bengasbhali uGrade 7 abantwana bahlezi ekhaya babiselwe emva last week sokuthwa baregister”.
Omunye okhale ezimathonsi kulumbuthano, nguNkosikazi Anna Makama ongumfelokazi eDambashoko odabuka kwele South Africa.
“Ngazalwa eGoli ngakhomba umuntu walapha eZimbabwe wagula umkami wabhubha ngasala labantwana labazukulu lokhu ngitshitsha emahofisini bathi ngaphandle kokuthi ubuyele ngakini lalumuhla lokhu ngihlezi lalamuhla lokhu ngihlezi nginjalo angilasithupha labantwana abalazithupha lokubuyela angisakwanisi ukubuyela ngiyabuyela ngani ngingelamali ngiyabe ngiyathe kumasobhuku – hayi thina lokhu asikungeni , sengithwele nzima angisakwazi ukuthi ngithini.
UNkosikazi Precious Njazi oweMatshetsheni uthi uhulumende kumele aphe izizalwane zakuleli lezincwadi kungela mbhadalo ukuze uzulu ayenelise ukubalazo.
“Kungaba njani vele ukuthi kungabhadaliswa, angilayo imali yokuthi ngigade ngiye koBulawayo ngiyethatha irecord yomntwana sengitshitshile khonapha eGwanda bengitshela ukuthi hamba uyedinga irecord, kufuneka imali yalokhu lalokhu, kungaba njani kuhle kuthe sokumahara ukuze yonke uzulu aregister ngoba phela ilizwe ngabantu ngakho abantu nxa bengaregister emtshineni bazayazakala njani ukuthi bakhona”.
UMgcinisihlalo walikhomidi yephalamende uRtrd Brg Gen . Levi Mayihlome olilunga ledale lephalamende emmela iMzingwane uthi udubo lwama birth certificates lukhulu.
“Sesifike lapha sesizwile imbono yabantu , uhlupho lolu kukhanya lukhulu,kukhanya into le ihlupha abantu emakhaya emaphandleni kakhulu kodwa labemadolobheni bahlangana lohlupho olufanayo iDepartment kaRegistrar General kuzamele kube leminye imithetho ezamele itshintshe kube lula bathathe amabirth certificates lokunye obekwenzela eHarare kuzame kubuye kumaprovince onke”.
Umqoqi wenhlelo zeCYDT UNkosazana Linda Mpofu uthi umthetho wokuthola amabirth certificates kuzamele uguqulwe ukuze kube lula ukuthola lezincwadi.
“Ekubhaleni kwethu ipetition sinanzelele ukuthi okuyikho okumqoka okumele bakwenze yikuthi batshintshe umthetho wonke wamabirth certificates lama ID ngoba ukhanya uwomile nko awululazi izinto uyawomisa”.
Abanye bakhale ngokuphuza kokuphuma kwencwadi zokuhambisa amapasipoti okumele aphume ngemva kwenyanga ezintathu kodwa asethatha phose umnyaka.
Abatsha abangene lumhlangano bathi umumo wezomnotho kawumanga kuhle eZimbabwe, kungakho bafuna amapasipoti ukuze bayedinga amadlelo aluhlaza kwamanye amazwe.
Your browser doesn’t support HTML5
Udaba lwamaBirth Certificate eGwanda siluphiwa nguAlbert Ncube