Abenhlanganiso ebona ngokulinganiswa kwamathuba phakathi kwabesilisa labesifazana, eyeGender Links baqhube uhlelo lokufundisa intathelizindaba ezilitshumi lanhlanu, edolobheni lakoBulawayo ngezempilakahle lamalungelo abantu, kugxilwe kwezocansi, emizameni yokukhuthaza ukulotshwa ngenhlonipho kwendaba zempilakahle eZimbabwe.
Ukulotshwa kwendaba eziphathelane lezempilakahle kubikwa kuphansi kakhulu ezweni, ngengakhoke abe Gender Links bekubone kufanele ukuqhuba hlelo lwemfundiso lolu emizameni yokukhuphukisa izinga lokulotshwa kwendaba zezempilakahle ngenhlonipho.
Ofundisa iNtathelizindaba ngohlelo lwezempilakahle lamalungelo abantu, umngcinisihlalo weNational University of Science and Technology Journalism Department emele iGender Links eZimbabwe, uMnu Thabani Tshuma uthi ukulotshwa kwendaba zempilakahle ikakhulu amalungelo kwezocansi kuphansi kakhulu.
"Ukulotshwa kwendaba zamalungelo ezempilakahle kukhangelwa lezocansi kuphansi kakhulu eAfrica nakho siphakathi kokufundisa iNtathelizindaba okwamalanga amabili koBulawayo. Ngemva kwalokho abazaloba indaba zabo bazangena kumincintiswano ezweni lamanye amazwe Africa bathole izicoco.''
Umqondisi wezempilakahle kukhansili yedolobho lakoBulawayo, uDokotela Edwin Sibanda uthi umanisiphala ulazo inhlelo ezibona ngezempilakahle yemacansini, ukuvikelwa kwemikhuhlane lokulondolozwa kwamalungelo abantu, emakilinika abo alitshumi lasifica munwe munye.
“ Ikhansili yedolobho lakoBulawayo ilazo inhlelo ezikhangela amalungelo ezempilakahle lezemacansini kuwo wonke amakilinika edolobho njalo abasakhulayo balazo inhlelo ezibhekane labo mayelana ngamalunelo abo ezempilakahle.''
Intathelizindaba yeNewsday engene kumfundiso yalamuhla uNqobani Ndlovu uthi uhlelo lolu luzabancedisa ekulobeni indaba ngezempilakahle kungela bandlululo.
“Thina njeneNtathelizindaba besinagxili kakhulu ekulobeni nezempilakahle lezemacani besikhanela kakhulu ezemidlalo lezombanazwe lobanje ezempilakahle lathi zisihlupha kodwa ngemfundiso le kuzasenza silobe ngazo."
UNobuhle Mgwaqo intathelizindaba yeUMthunywa, laye ugcizelela kulokhu.
“Imdundiso yalamuhla yeGender Links izasinceda ekulobeni indaba zamaKey populations ngoba sesifundile kuzasiphathisa ekulobeni indaba ngendlela ukuze uzulu amukele wonke umuntu ikakhulu labo abalobulili obungacaciyo."
Intathelizindaba yeCITES, uNkosazana Tanaka Murerwa uvumelane loMgwaqo.
“Uhlelo lolu nilubona luqhakatheke kakhulu noba umphakathi wethu ulakho ukuncindezela ngakho thina njengeNtathelizindaba silomlandu wokuloba ngakho."
Ukulotshwa kwamalungelo ezempilakahle kukhangelwe lezemacansini kubikwa kuphansi kakhulu, kusezingeni lokuthathu ekhulwini. Ucwaningo lweGender Links luveza ukuba indaba zempilakahle ezwekazi leAfrica ziphansi kakhulu nanko bekubone kuqakathekile ukuhlomisa intathelizindaba ngokulotshwa kwalezindaba ngenhlonipho okungalulazi labo abayabe belotshwa ngabo.
Your browser doesn’t support HTML5
Udaba lokubhalwa kuhle kwezempilakahle siluphiwa nguAnnahstacia Ndlovu