Abenhlanganiso yeCitizens Movement, yona esekela icele leCCC elikhokhelwa nguMnu Jameson Timba bathi lanxa bencitshwe imvumo ngamapholisa, bazaqhubeka ngohlelo lwabo lokutshengisela ezitaladeni eKaroi ngoLwesibili besola ukubotshwa kukaTimba labanye bakhe abangamatshumi phose ayisitshiyangalombili, 78.
Abantu laba sebelamaviki amathathu bevalelwe ngemva kokubotshwa bebuthene endlini kaTimba mhlaka 16 ngenyanga edluleyo bethakazelela usuku lweDay of the African Child.
Amapholisa athi babeqoqa udlakela, kodwa bayakulandula lokhu besithi babenanza usuku lolu ngokuthula futhi kungelasidingo sokungenela kwamapholisa.
Izizalwane zeZimbabwe ezihlala kweleBhilithani eziphansi kwenhlanganiso yeAction for Southern Africa lazo ziqoza ukutshengisela kulelolizwe zisithi uTimba labanye bakhe kumele bakhululwe.
Ikhulumeli seCCC ekhokhelwa nguTimba uMnu Promise Mkhwananzi utshele iStudio 7 ukuthi amapholisa ephula amalungelo abantu ngokubalisa ukuthi batshengisele ngokuthula.
UMnu Timba labanye bakhe bazamiswa njalo enkantolo kamantshi ngoLwesibili.
Umkhokheli wamapholisa eHurungwe obhale incwadi yokwala ukuvumela ukutshengisela kweCitizens Movement uChief Supretendent Karuru lesikhulumeli samapholisa elizweni lonke jikelele uCommissioner Paul Nyathi abadobhanga incingo zabo.
Your browser doesn’t support HTML5
Ingxoxo loMnu Promise Mkhwanazi