Abenhlanganiso yabaphila ngokuthengisa, sebekhalaze kuhulumende ukuba avule imingcele yelizwe ukuze amalunga abo enelise ukuyathenga phandle kwelizwe babuye bethengisa ekhaya baphilise imuli zabo.
AbeBulawayo Vendors and Traders Association bathi hulumende wayefake isinqumo sokuba uzancedisa abaphila ngokuthengisa ngesikhathi seLock-down kodwa kuze kube lamuhla lokhe kungakaze kufezeke, ngakhoke umangoye uselala eziko kunengi lamalunga.
Lokhu sokufake impilo yamalunga engozini nanku lenani labantu abachapha ngokungekho emthethweni ikakhulu emfuleni uLimpopo liqansa mihla ngemihla kubangelwa yikuba adinga ukuziphilisa bona lemuli zabo.
Imingcele lokhe yavalwa ekupheleni kwenyanga kaMbimbitho lonyaka, lokhu kungeyinye yezindlela zokunqabela ukumemetheka kwegcikwane leCovid 19. Lokhu kuvalwa kwemingcele bekunqabela uzulu oyangaphandle kwelizwe kodwa izizalwane zeZimbabwe ebezingaphandle kwelizwe zona zilokhe zivunyelwe ukuba ziphenduke ekhaya.
Umqondisi weBulawayo Vendors and Traders Association umnumzana Mike Ndiweni ukhuluma ngesikhalazo abasifake kuhulumende.
“Sesilobele uhulumende incwadi sicela ukuthi nga uhulumende uyakhulumisana lohulumende weSouth Africa bavule ama border ngendlela ezalandela imithetho ebekiweyo eyokuthi abantu bengamemethekisi umkhuhlane we Corona. Ngemva kokunanzelela ukuthi abantu abanengi bake babanjwa ema border bechapha emingceleni engavunyelwayo. Abantu abanengi bathwele nzima ngoba bachapha lapho okungavunyelwa khona futhi njalo umkhuhlane lo ungamemetheka kakhulu ngoba kungela muntu obahlolayo lapho bengena kumbe bephuma elizweni.”
Unkosikazi Jacqueline Ndlovu oziqhatshileyo uthi omama abanengi basengozini yokudlwengulwa nxa bechapha kundawo ezingekho emthethweni.
“Mina bengikhangelele ukuthi ngabe siyaqala ukusebenza ngoba omama abanengi sebesenza i illegal cross border trading. Okubafaka engozini zokudlwengulwa, ukutshontshelwa ngamagumaguma lawa ahlala emgceleni. Ngabe ihulumende ziyavumelana ukuthi sikwanise ukuyathenga impahla ngokusemthethweni, ngoba yonale iCorona Virus asazi ukuthi iyaphela nini kumbe kuyaba yinto esiyahlala layo.”
Unkosikazi Helen Thebe ophila ngokuthengisa uthi imali enengi isiphelela ekuhlawuleni abazomvikela ukuze bachaphe kuLimpopo.
“Okwakhathesi vele sisebenza nzima kakhulu ngoba ukuze wenelise ukuthi uchaphe emfuleni kumele udize amapholisa awe side yakithi ngapha uphinde uyediza ku South African side uphinde ubhadale lalabo abazabe bekuchaphisela izinto zakho emfuleni. Uyabe uthwele ama box amanengi, abanye bazakutshela ukuthi R50 uchaphisa so yikho okuca kusenza ukuthi lathi nxa sifika ngapha intengo yezinto ibe sikhuphukile. Besicela ukuthi ngabe uhulumende uyasivulela ukuze lathi siphile lemuli zethu.”
Umnumnzana Mkhulunyelwa Maphosa othengisayo uthi lokhe bengakaze bathole leyomali abayithenjiswa nguhulumende.
“Imali esayithenjiswa nguhulumende asikayitholi, okwakhathesi sesahamba sayathatha amaline e Netone eMhlahlandlela ukuze senelise ukuthola leyo mali. Imali leyi ngokuzwa ngabasiki bebunda bathi ingabe iyi $180 kusiya ku$200 Zimdollar. Imali le incane kakhulu okokuthi kasisoze isise ndawo.”
NgoLwesibili,uhulumende uyekethise imigoqo yokuvikela ukumemetheka kweCoronavirus, lapho amabhizimusi asengezelelwe isikhathi sokusebenza, asezavala ngohalf past 4 emini yantambama. Kuthi abantu sebevunyelwe ukuhambahamba kuze kuyefika ihola lesitshiyagalombili ebusuku. Abathengisayo bathi bebekhangelele ukuthi uhulumende abananze labo ayekethise eminye imigoqo ebavimba ukuba basebenze ngokugcweleyo. Uhulumende lokhe wathembisa abazisebenzayo ukuthi uzabalamulela ngokubapha imali ngesikhathi bengasebenzi kodwa lokhe bengakaze bayithole imali leyi.
Imizamo yokuxhumaa lomphathintambo wezamabhisimusi uNkosikazi Sithembiso Nyoni ayiphumelelanga ngoba ubengadobhi ucingo lwakhe. Kodwa ecina ukukhuluma ngodaba lokuphathisa abaphila ngokuthengisa uNkosikazi Nyoni wayethe uhlelo lokubanikeza imali beluphuziswa yikuthi abantu bebengela ncingo ezilama Ecocash kumbe i One money. Wathi uhulumende senikeze abantu inumber zencingo lapho abazakwamukela imali. Selokhe abantu banikezwa inombolo zencingo ngoNhlangula abakaze banikezwe imali.