Abazali Iabakunhlanganiso ezibona ngokuvikelwa kwamalungelo abantwana eZimbabwe bathi abantwana abanengi bathwele nzima elizweni ngenxa yezizatho ezigoqela ukusilela kwemali yezifundo, izikolo ezingela ngwalo lomango omude okuya ezikolo.
Bathi abantwana abangamankazana bakusimo esibi kakhulu ngoba abanye babo bazithwala besesebancane, ikakhulu emaphandleni.
Ukukhathazeka lokhu kuvezwe kuthange emkhosini omkhulu wokunanza usuku lwabantwana olweWorld Children’s Day oqhutshelwe eVictoria Falls lapho obekulabakhokheli bamazwe akuzwekazi leAfrica, agoqela umongameli Emmerson Mnangagwa, lomunye wakhe we Botswana umongameli Duma Boko.
Bekulabantwana abafika phose inkulungwane eziyisikhombisa abananze usuku lolu edolobheni leli abavela eZimbabwe, Malawi, Uganda, Bostwana, Zambia lamanye amazwe.
World Children's DAY, Victoria Falls
Izikhulumeli ezehlukeneyo ezigoqela ezikunhlanganiso yeUnited Nations Children’s Fund zikhuthazane ukuba izwekazi leli kufuze lihloniphe izimiso zomthetho ovikela abantwana.
Ngezikhathi kuqhubeka umhlangano lo, sixhumane loMnumzana Misheck Ngulube owenhlanganiso yeUmhabi Children’s Fountain of Hope, osabele ngokwephulwa kwezimiso lezi kwezemfundo, esithi abanengi kabasunguli imfundo ngemnyaka efaneleyo.
“Igap yoneyo yenza umntwana ahle abe disadvantaged nxa siqathanisa lesisikhiweni. Ungaze uye esikolo lamabhuku kwakho besenza ukuqhubana nje, abanye lezikolo bacina bengayi ngoba lesikolo sikhatshana.”
Phezu kwalokhu, uthi ngenxa yendlala le ekhona elizweni, abantwana sebephazamisekile kakhulu.
World Children's Day
“Abantwana abakwanisi ukuqinisela ilanga lonke bengadlanga. Abadala sebengazama, lamanzi kabanathi ahlanzekileyo lokhe benatha awemachibini.”
Amazwi kaMnu. Ngulube asekelwa ngumholi wesigaba seHwange, uDokotela Fungai Musinami, othi esibhedlela sekwande abantwana lasebeluphele abelatshwa umkhuhlane we-kwashioker.
UNkosikazi Rosemary Muleya wesigabeni seLukosi laye obekulumthimba uthi indlala, ukuswelakala kwamakilinika kanye lobude bomango wokufika ezikolo, kuyafiphaza amalungelo abantwana.
"Amakhaya ethu kwalalamakilinika, lezibhedlela zikhathana kubalelela lezikolo. Umntwana kwenza acine lesikolo engasasithandi ngoba uzahamba njalo engafakanga lutho ethunjini. Apase njani? Imhlangano enje kufuze iphane ingqobe kulokhu.”
Sixoxe njalo lesakhamuzi seFilabusi, uMnumzana Roland Sibanda, othi bathwele nzima labantwana abangamankazana.
World Children's Day, Victoria Falls
“Uhlupho yikuthi bayazithwala bebancane, konke lokhu kubangelwa ngobaba abangakwazi ukuzibamba, abangelabuntu, bengahloniphi umphakathi.Lokhu kwenziwa ngabalemali labangelayo, abantwana becine besonakala njalo.”
UAlderman Roy Dube weVictoria Falls uthi izidakamizwa kanye lokungahlonitshwa kwemthetho enqanda ezemsebenzi, ngokunye njalo okuhluphayo.
“Abaholisi abantwana ngemfanelo, umuntu osebenzayo sefana nje lohleziyo, silabantwana njalo abasezikolo abaswela ukufundiswa labazali ababanakekelayo.”l
Abanye njalo bathi abantwana sebesetshenziswa ukuba ngonondindwa emadolobheni afana leHwange leVictoria Falls, okubafaka engozini yokuthola imikhuhlane efana legcikwane le HIV.
Ugatsha lwezemfundo ngoNhlangula lubikele inkundla yephalamende ukuba abafundi abedlula inkulungwane ezine -4,557 bakhulelwa, kunani leli abafika phose inkulungwane ezine 3,942 bengabemaphandleni.
Evula ngokusemthethweni lumcimbi weWorld Children’s Day, uMongameli Mnangagwa uthe kungumthwalo wenkokheli zezwekazi leli ukuba izikhalazo lezi zihluzisiswe, abantwana bethole imfundo lokudla okwaneleyo, lezinye indingeko.
SEE ALSO:
Udaba Esilwethulelwe NguNokuthaba Dlamini